დღეს, 7 ოქტომბერს 20:00 საათზე, ქართული ოცნების გორგასლის ოფისში, პრემიერმინისტრი ირაკლი კობახიძე, ოცნების საარჩევნო პროგრამის პრეზენტაციას გამართავს.

"დღეს, საზოგადოებას ქართული ოცნების საარჩევნო პროგრამას გავაცნობთ.

საზოგადოებას, რომელმაც უკვე იცის, რომ ჩვენი დასანქცირების თუ გარედან ისტერიული შემოტევების მთავარი მიზეზი რუსეთთან ომის არდაწყება და სანქციების არდაწესებაა, რომელიც ოკუპანტი ქვეყნის ეკონომიკას მაქსიმუმ 0,3%-ით დააზიანებდა, ჩვენსას კი — 12-13%-თ. ეს იგივეა, რაც ორჯერ უარესი მდგომარეობა, ვიდრე პანდემიის დროს.

გულწრფელად მიკვირს იმ "პოლიტიკოსების" თუნდაც მცირერიცხოვანი ამომრჩევლის, რომლებიც მათ გარდაუვალი შიმშილისთვის ან სიკვდილისთვის სწირავენ.

მხოლოდ მშვიდობითა და ღირსებით ევროპისკენ სვლაზე ბევრი ვისაუბრეთ. მხოლოდ კეთილდღეობით და უკეთესი ცხოვრებით ევროპული ოჯახის სრულფასოვანი წევრობისკენ სვლის გარანტიებზე, დღეს საღამოს, საქართველოს პრემიერ-მინისტრი, ირაკლი კობახიძე მოგიყვებათ", — წერს მმართველი პარტიის გენერალური მდივანი, მამუკა მდინარაძე სოციალურ ქსელში.

ქართული ოცების საარჩევნო პროგრამის წარდგენა თავდაპირველად 1 ოქტომბერს იყო დაგეგმილი, თუმცა ირაკლი კობახიძის ჯანმრთელობის მდგომარეობის გამო პრეზენტაცია გადაიდო.