აშშ-ს მიერ სანქცირებული ზვიად ხარაზიშვილი, იგივე "ხარება" შსს-ს მიერ საარჩევნოდ სპეციალურად შექმნილი "ტერიტორიული ჯგუფების" დაკომპლექტებაში მიიღებს მონაწილეობას.

შინაგან საქმეთა სამინისტრომ 4 ოქტომბერს გამოაქვეყნა მინისტრ ვახტანგ გომელაურის ბრძანება, რომელიც არჩევნებთან დაკავშირებით, ტერიტორიული ჯგუფების შექმნას ითვალისწინებს, რომლებიც სამართალდარღვევების გამოვლენასა და პრევენციაზე იზრუნებენ.

ბრძანების თანახმად, პოლიციის დეპარტამენტების სამოქმედო ტერიტორიებზე, შეიქმნება ტერიტორიული ჯგუფები, რომლებიც პასუხისმგებელნი იქნებიან სამართალდარღვევების გამოვლენასა და პრევენციაზე.

არჩევნების უსაფრთხო და თავისუფალ გარემოში ჩატარების ხელშეწყობის მიზნით, შესაბამის ჯგუფებს დაევალათ სამოქმედო ტერიტორიაზე უზრუნველყონ სათანადო ზომების მიღება, საჭიროებისამებრ "პოლიციის შესახებ" საქართველოს კანონის შესაბამისად, პრევენციული საპოლიციო ღონისძიებების განხორციელება.

ბრძანება პოლიციელებს ავალდებულებს სამსახურებრივი მოვალეობის შესრულებისას დაიცვას პოლიტიკური ნეიტრალობის პრინციპი.

ჯგუფები იქმნება: აჭარის, ქვემო ქართლის, შიდა ქართლის, მცხეთა-მთიანეთის, კახეთის, სამცხე-ჯავახეთის, იმერეთის, რაჭა-ლეჩხუმისა და ქვემო სვანეთის, გურიის, სამეგრელო-ზემო სვანეთისა და თბილისის პოლიციის დეპარტამენტების სამოქმედო ტერიტორიებზე.

ამავე ბრძანებაში წერია, რომ "ტერიტორიული ჯგუფის" შემადგენლობაში შედის "სამინისტროს განსაკუთრებულ დავალებათა დეპარტამენტის (გდდ) ხელმძღვანელის მიერ გამოყოფილი წარმომადგენელი".

გდდ-ის ხელმძღვანელი კი ზვიად ხარაზიშვილია, რომელსაც მოადგილე მილერი ლაგაზაურთან ერთად, აშშ-მ 16 სექტემბერს ფინანსური სანქციები დაუწესა. მათთან ერთად, საქართველოში ფუნდამენტური თავისუფლებების, მათ შორის, გამოხატვის თავისუფლების შეზღუდვისთვის, აშშ-მ სანქციები დაუწესა პრორუსული ალტ-ინფოს ორ წევრს: ზურა მახარაძეს და კონსტანტინე მორგოშიას.