დღეს, თბილისის საქალაქო სასამართლომ დამნაშავედ ცნო ქალზე ძალადობაში ბრალდებული 29 წლის პარიზის ოლიმპიური თამაშების მონაწილე და კრივში ევროპის ჩემპიონი გიორგი ყუშიტაშვილი. მას ჯარიმად 5150 ლარის გადახდა დაეკისრა.

გამოძიება გიორგი ყუშიტაშვილს ქალის ცემას ედავებოდა, რაც სისხლის სამართლის კოდექსის 126-ე მუხლის პირველი ნაწილით ჩადენილი დანაშაულია.

3 ოქტომბერს გამართულ სასამართლო სხდომაზე, ყუშიტაშვილმა ბრალი აღიარა და განაცხადა, რომ თავს დამნაშავედ ცნობს.

დაზარალებული ქალი რადიო თავისუფლებასთან ინტერვიუში ამბობს, რომ ერთი წელი ელოდებოდა ამ სხდომას — “ვემზადებოდი სასამართლოში ჩვენების მისაცემად, რადგან ბრალდებულმა აღიარა დანაშაული, ჩვენების მიცემა აღარ გახდა საჭირო”. დაზარალებულს მოსამართლემ მხოლოდ ორი კითხვა დაუსვა: თანახმა იყო თუ არა ბრალდებულს ამინისტია შეხებოდა და რა სასჯელს განიხილავდა მისთვის.

„ჩემთვის სასჯელის სახეს არ ჰქონდა მნიშვნელობა. აღარ ჰქონდა მნიშვნელობა, ეს ადამიანი ჯარიმას გადაიხდიდა თუ ერთი წლით ჩაჯდებოდა ციხეში, მთავარი იყო, რომ სასამართლოს ის დამნაშავედ ეცნო ჩადენილი დანაშაულისთვის და ასეც მოხდა. დადგა გამამტყუნებელი განაჩენი“, - ამბობს ქალი.

დაზარალებულმა გამოხატა ცნობისმოყვარეობა იმის თაობაზე, საქართველოს სახელით დაუშვებდა თუ არა კრივის ფედერაცია ძალადობის მუხლით გასამართებულ ადამიანს საერთაშორისო ტურნირებზე.

“ამ ერთი წლის განმავლობაში, იმდენი ვიბრძოლე და იმდენი ომი გამოვიარე საკუთარ თავთან, რომ მე მისი აღარ მეშინია, მაგრამ სხვა ადამიანების გამო მეშინია... როდესაც სულ რამდენიმე დღის წინ ვნახეთ, როგორი სისასტიკით მოკლეს კესარია აბრამიძე, არ მგონია სწორი, რომ ქალზე ძალადობაში დამნაშავედ ცნობილი კაცი წახალისებული იყოს სპორტის სამყაროს მხრიდან და მან ისევ ისე გააგრძელოს სპორტული კარიერა, როგორც აქამდე“, — თქვა ქალმა.

გიორგი ყუშიტაშვილის ინტერესებს სასამართლოში კრივის ფედერაციის ვიცე-პრეზიდენტი და ადვოკატი— გიორგი ჭოჭუა იცავდა.

მისი რადიო თავისუფლებასთან მტკიცებით, იგი არ ცნობდა მოკრივეს დამნაშავედ და ამბობდა, რომ სასამართლო პროცესზე მის უდანაშაულობას “აუცილებლად დაამტკიცებდნენ”.

გამოძიებაზე დაყრდნობით ვიგებთ, რომ 23 ოქტომბერს, გიორგი ყუშიტაშვილმა, თბილისში, ხომლელის ქუჩის მიმდებარედ, ახალგაზრდა ქალს ფიზიკურად გაუსწორდა.

იმ პერიოდში, ქალმა რადიო თავისუფლებას ინტერვიუ მისცა, სადაც თქვა, რომ მოკრივემ მას მანქანაში სცემა.

"გვიან ღამით მის სახლთან რომ მივედით, სახლში ასვლა შემომთავაზა, თუმცა, არ მინდოდა აყოლა და ტაქსის გამოძახება გადავწყვიტე. სანამ ტაქსის გამოვიძახებდი, წავკამათდით. ამ კამათის მიზეზმა გააღიზიანა, მეცა თმაში და თავი მარტყმევინა. ამ მომენტში, არ ვიცი როგორ, მაგრამ ვიდეოს ჩართვა მოვახერხე და ვიდეოსთან ერთად "ფლეშიც" ჩაირთო. ამაზე სულ გაგიჟდა, ტელეფონის წართმევა უნდოდა, მირტყამდა. ძალიან შემეშინდა და ჩემი ხელით ვაჩვენე ტელეფონი, რომ ვერაფრის გადაღება ვერ მოვასწარი და ცოტა დამშვიდდა, გადავიდა მანქანიდან", — ჰყვება ქალი რადიო თავისუფლებასთან.

დაზარალებულმა 112-ში დარეკა, თუმცა მისივე მტკიცებით როცა ყუშიტაშვილმა შეიტყო რომ გადაუდებელი სამსახურის ოპერატორს ესაუბრებოდა, მაშინ მეორედ დაესხა თავს.