რუსეთის მთავრობამ ოკუპირებულ სამხრეთ ოსეთში ერთობლივი რუსული სამხედრო ბაზისთვის მიწის ნაკვეთის გადაცემაზე მოლაპარაკებების დასაწყებად თავდაცვის სამინისტროს წინადადება მიიღო. მთავრობის ბრძანება ოფიციალურ იურიდიულ საინფორმაციო პორტალზე გამოქვეყნდა.

"რუსეთის ფედერაციის საერთაშორისო ხელშეკრულებების შესახებ" ფედერალური კანონის მე-11 მუხლის მე-3 პუნქტის შესაბამისად, მიიღება რუსეთის თავდაცვის სამინისტროს წინადადება, რომელიც შეთანხმებულია რუსეთის საგარეო საქმეთა სამინისტროსთან, მოლაპარაკებების გამართვაზე ხელმოწერის შესახებ. ოქმი რუსეთის ფედერაციის თავდაცვის სამინისტროსა და სამხრეთ ოსეთის რესპუბლიკის თავდაცვის სამინისტროს შორის სამხრეთ ოსეთის რესპუბლიკის ტერიტორიაზე ერთობლივი რუსული სამხედრო ბაზის მიწის ნაკვეთის გადაცემის შესახებ", - ნათქვამია ბრძანებაში.

რუსული მე-4 სამხედრო ბაზა ოკუპირებულ სამხრეთ ოსეთში მდებარეობს და იქ 3500-მდე სამხედრო იმყოფება.

რუსული მედია წერს, რომ გასულ კვირას საქართველოს ხელისუფლებამ გამოაცხადა, რომ ოკუპირებული აფხაზეთისა და სამხრეთ ოსეთის ტერიტორიებიდან რუსეთის სამხედრო ბაზების გაყვანას მოელის. მათვე თქმით, განცხადება რუსეთის საგარეო საქმეთა მინისტრ სერგეი ლავროვის სიტყვებს მოჰყვა მოსკოვის მზადყოფნის შესახებ, დაეხმაროს საქართველოს ოკუპირებულ აფხაზეთთან და სამხრეთ ოსეთთან შერიგებაში.

"ის ფაქტი, რომ რუსეთი მიესალმება და მხარს უჭერს შერიგებას, რა თქმა უნდა, პოზიტიურია. თუმცა განცხადებებთან ერთად კარგი იქნება ქმედითი ნაბიჯების გადადგმა. მაგალითად, ჩვენი ტერიტორიების იმ ნაწილებშიც კი, რომლებიც ოკუპირებულია და რუსული სამხედრო ბაზებია განთავსებული, კარგი იქნება, დავიწყოთ მათი გაყვანის სამოქმედო გეგმის შემუშავება და ჯარი საქართველოს ტერიტორიებიდან", — განაცხადა მმართველი პარტია ქართული ოცნების გენერალურმა მდივანმა კახა კალაძემ.