კლეოპატრა, კეტრინ ჰოლი, ქერონ პრინგლი... ელიზაბეთ ტეილორს მრავალი როლით ვიცნობთ, თუმცა მისი რეალური ცხოვრებაც კინემატოგრაფიულ შედევრს მოგაგონებთ. ძველი ჰოლივუდის უკანასკნელ კაშკაშა ვარსკვლავს დრამატული სასიყვარულო ისტორიები მთელი ცხოვრების განმავლობაში გამოარჩევდა სხვა ცნობილი ადამიანებისგან, რის გამოც ხშირად ეხვეოდა ტაბლოიდებისა და პაპარაცების კრიტიკის ქარცეცხლში. ამ სტატიაში ელიზაბეტ ტეილორის 10 საქმროზე გიამბობთ და მის მომაჯადოებელ ნიშნობის ბეჭდებსაც გაჩვენებთ:

1. უილიამ პოული უმცროსი

აშშ-ს არმიის პილოტი, უილიამ პოული უმცროსი ელიზაბეთ ტეილორის პირველი საქმრო იყო. მან ახალგაზრდა ტეილორს ცოლობა 1949 წელს სთხოვა, მაშინ, როცა მომავალი მსახიობი მხოლოდ 17 წლის იყო. პოულიმ ტეილორი ბალიშის ფორმის თეთრი ბრილიანტის ბეჭდით დანიშნა, რომელიც ქალის საქორწინო სამკაულთა კოლექციის პირველი ექსპონატი გახდა.

მიუხედავად იმისა, რომ ტეილორმა ამ რომანს მისი "პირველი ზრდასრული სიყვარული" უწოდა, საბოლოოდ პოულიზე არ დაქორწინდა, რადგან გული ჰოლივუდისკენ მიუსწრაფოდა და დაოჯახება ამ ასაკში მის გეგმებში არ შედიოდა.

2. კონრად ჰილტონი

კონრად ჰილტონი ელიზაბეთ ტეილორის პირველი ქმარი იყო. ჰილტონების სასტუმროების ქსელის 24 წლის მემკვიდრემ მსახიობს ცოლობა 1950 წელს, ოთხკარატიანი პლატინის ბრილიანტის ბეჭდით სთხოვა. ქორწილი Metro Goldwyin Mayer-ის ორგანიზებით ჩატარდა და 18 წლის ელიზაბეთი ბევერლი ჰილზის ეკლესიაში დაქორწინდა. წყვილი რვა თვეში განქორწინდა, რადგან ჰილტონი ტეილორზე ფიზიკურად ძალადობდა და ალკოჰოლიზმის პრობლემა ჰქონდა.

3. მაიკლ უაილდინგი

1952 წლის თებერვალში ელიზაბეთ ტეილორი ბრიტანელ მსახიობზე, მაიკლ უაილდინგზე დაქორწინდა. მასზე ოცი წლით უფროსმა უაილდინგმა ტეილორს ხელი საფირონისა და ბრილიანტის მსხვილი ბეჭდით სთხოვა. წყვილს თანაცხოვრებისას ორი ვაჟი, მაიკლ ჰოვარდი და კრისტოფერ ედვარდი შეეძინა და 1957 წელს განქორწინდნენ.

4. მაიკ ტოდი

1957 წელს კინოპროდიუსერმა მაიკ ტოდმა 24 წლის ელიზაბეთ ტეილორს ცოლობა განსაცვიფრებელი, 29.4 კარატიანი კარტიეს ბეჭდით სთხოვა. ისინი მექსიკაში დაქორწინდნენ.

ტეილორის ყველაზე ცნობილი ქმარი რიჩარდ ბარტონია, თუმცა მისი მემუარებიდან ვიგებთ, რომ მისი ცხოვრების მთავარი სიყვარული სწორედ მაიკ ტოდი იყო. მათი ისტორია მაშინ დასრულდა, როცა ტოდის პირადი თვითმფრინავი, The Liz (რომელსაც სახელიც ტეილორის პატივსაცემად დაარქვა), ავარიულად ჩამოვარდა 1958 წლის 22 მარტს, მათი ქორწინებიდან 1 წლის გასვლის შემდეგ.

სწორედ მაიკ ტოდმა აჩუქა ტეილორს კარტიეს დაუვიწყარი ბრილიანტის გვირგვინი, რომელიც მსახიობს 1957 წელს ოსკარის დაჯილდოების ცერემონიაზე ეკეთა. "შენ ჩემი დედოფალი ხარ და გვირგვინიც გეკუთვნის," — ტეილორის მემუარებიდან ვიგებთ, რომ სწორედ ამ სიტყვებით უსახსოვრა ეს საჩუქარი ქმარმა.

5. ედი ფიშერი

მომღერალი ედი ფიშერი, რომელიც ტეილორის გარდაცვლილი ქმრის, მაიკ ტოდის საუკეთესო მეგობარი იყო, ელიზაბეთ ტეილორის მეოთხე ქმარი გახდა. ფიშერზე დანიშვნისას მსახიობი ჯერ კიდევ ტოდის მიერ ნაჩუქარ ბეჭედს ატარებდა, ამიტომ მომღერალმა ნიშნობის აღსანიშნავად ტეილორს 40-კარატიანი ბრილიანტის სამაჯური აჩუქა. სამაჯურს 50 დამაბრმავებელი ბრილიანტი ამშვენებდა. წყვილი 1959 წლის 12 მაისს დაქორწინდა და 1962 წლამდე იყვნენ ერთად, იქამდე, სანამ ტეილორი კლეოპატრას გადასაღებ მოედანზე რიჩარდ ბარტონს გაიცნობდა.

6. რიჩარდ ბარტონი

რიჩარდ ბარტონს ელიზაბეთ ტეილორისთვის ცოლობა ბეჭდით არ უთხოვია, თუმცა ჰოლივუდის ყველაზე მშვენიერ ქალს სწორედ უელსელმა მსახიობმა მიუძღვნა კოლექციის ყველაზე მნიშვნელოვანი სამკაულები, მათ შორის 33.19 კარატიანი კრუპის ბრილიანტი. ისინი 1964 წელს დაქორწინდნენ და 1974 წელს განქორწინდნენ. მათი ვნებიანი, დრამითა და ეჭვიანობით გაჟღენთილი სიყვარულის ისტორია ჰოლივუდს მუდამ ემახსოვრება – ბარტონზე და ტეილორზე არაერთი ფილმია გადაღებული. 1975 წელს ისინი მოკლე დროით ისევ დაქორწინდნენ, თუმცა მალევე, სამუდამოდ თქვეს რომანზე უარი.

ბარტონმა ელიზაბეთ ტეილორის სამკაულების კოლექციას ყველაზე მნიშვნელოვანი ნიმუშები შემატა, მათ შორის, ბულგარის ზურმუხტისა და ბრილიანტის ყელსაბამი. "ერთადერთი იტალიური სიტყვა, რომელიც ელიზაბეთმა იცის, ბულგარია," — ხშირად ხუმრობდა ბარტონი.

7. ჯონ უორნერი

1976 წელს, იისფერ ტურბანსა და ვერცხლისფერი მელიის ქურთუკში გამოწყობილი ელიზაბეთ ტეილორი მომავალ სენატორზე, ჯონ უორნერზე დაქორწინდა. მის მარცხენა ხელს ლალისა და ბრილიანტის ქვებით შემკული ნიშნობის ბეჭედი ამშვენებდა. ეს ტეილორის პირველი ფერადი ნიშნობის ბეჭედი იყო. წყვილი მაშინ განქორწინდა, როცა 1982 წელს უორნერი ამერიკის სენატორი გახდა და პოლიტიკოსის ცოლმა მუდმივი მარტოობა ვერ აიტანა.

8. ვიქტორ ლუნა

მალევე, ტეილორი კვლავ დაინიშნა. 1983 წელს ის მექსიკელ ადვოკატს, ვიქტორ ლუნას ცოლობაზე დათანხმდა და 16-კარატიანი საფირონის ბეჭედი მოირგო, თუმცა ისინი არ დაქორწინებულან.

9. დენის სტაინი

ლუნას მსგავსად, ვერც დენის სტაინმა მიაღწია მიზანს და ტეილორზე ვერ დაქორწინდა. მან მსახიობს ცოლობა ამეთვისტოთი გაფორმებული ბეჭდით სთხოვა. მიუხედავად წარუმატებელი რომანისა, ისინი ცხოვრების ბოლომდე მეგობრობდნენ.

10. ლარი ფორტენსკი

ლარი ფორტენსკი მშენებელი იყო, რომელიც ტეილორის მეშვიდე და უკანასკნელი ქმარი გახდა. მათ ერთმანეთი 1988 წელს, ბეტი ფორდის სამედიცინო ცენტრში გაიცნეს, მაშინ, როცა ტეილორი პნევმონიას მკურნალობდა. ფორტენსკიმ მსახიობს ცოლობა უბრალო ბრილიანტის ბეჭდით სთხოვა. წყვილი ტეილორის ახლო მეგობრის, მაიკლ ჯექსონის რანჩოზე დაქორწინდა. მათი ქორწინება 5 წელი გაგრძელდა.

ელიზაბეთ ტეილორის სამკაულები და სასიყვარულო ისტორიები არაერთი ფილმისა თუ წიგნის შთაგონება გახდა. ბევრი კრიტიკოსი აღნიშნავს, რომ ტეილორის ცხოვრების სიყვარული ძვირფასი ქვები იყო და — კაცები. "ქორწინებები დავასრულე, თუმცა კაცებთან ურთიერთობა — არა," — თქვა მსახიობმა ფორტენსკისთან განქორწინების შემდეგ. მართლაც, საინტერესო თავგადასავლები და თაყვანისმცემლების ნაჩუქარი სამკაულები ელიზაბეთ ტეილორს ცხოვრების ბოლომდე არ მოჰკლებია.