ვოლოდიმირ ზელენსკიმ Abc News-თან ინტერვიუში განაცხადა, რომ ომის დასასრული ახლოსაა, რასაც კრემლის პასუხი მოჰყვა. როგორც რუსეთის ფედერაციის პრეზიდენტის პრეს-მდივანმა, დიმიტრი პესკოვმა განაცხადა, ნებისმიერი სამხედრო მოქმედება აუცილებლად მშვიდობით დასრულდება, თუმცა სპეციალური სამხედრო ოპერაცია დამთავრდება მაშინ, როცა რუსეთი მიზნებს მიაღწევს.

"ჩვენთვის საკუთარი მიზნების შესრულება უალტერნატივოა. როგორც კი ეს მიზნები შესრულდება, ამა თუ იმ გზით, სპეციალური სამხედრო ოპერაციაც დასრულდება", — განაცხადა პესკოვმა

პესკოვმა უპასუხა კითხვასაც იმასთან დაკავშირებით, ამერიკის რომელი კანდიდატის გაპრეზიდენტება უფრო მისაღებია რუსეთისათვის.

"ეს საკითხი ჩვენი პრიორიტეტი არ არის, ჩვენ ჩვენი პრობლემებით ვცხოვრობთ და ჩვენი დღის წესრიგი გვაქვს. ეს ამერიკელ ამომრჩევლებს უნდა აინტერესებდეთ", — აღნიშნა პუტინის პრეს-მდივანმა