ოკუპირებული აფხაზეთის ე.წ პრეზიდენტის, ასლან ბჟანიას თქმით, რუსეთის გადაწყვეტილება, აფხაზეთის საბიუჯეტო სფეროს თანამშრომლებისთვის ხელფასების თანადაფინანსების შეჩერების შესახებ, მოქალაქეების დიდ ნაწილზე აისახება.

რუსეთის ფედერაციიდან მიღებულ დოკუმენტში, სადაც 1-ელი სექტემბრიდან დასაქმებულთა ხელფასების თანადაფინანსების შეჩერების შესახებაა საუბარი, აღნიშნულია, რომ დაფინანსება შეჩერებული იქნება იქამდე, სანამ აფხაზური მხარე არ შეასრულებს ხელშეკრულებებით დადგენილ პირობებს.

"დაფინანსების პროცესის შეჩერება, რა თქმა უნდა, შეეხება აფხაზეთის მოქალაქეების დიდ ნაწილს - მასწავლებლებს, ჯანდაცვის მუშაკებს, კულტურის მუშაკებს და ბევრ სხვას. ამიტომ, ახლა ამ საკითხს აფხაზეთის ხელმძღვანელობა - პრეზიდენტი, მთავრობა და პარლამენტი ამუშავებენ", — თქვა ბჟანიამ.

აფხაზეთის ე.წ. პრეზიდენტი განმარტავს, რომ რუსეთთან ურთიერთობაში ის კრიზისს ვერ ხედავს.

"სახელმწიფოთაშორის ურთიერთობებში კრიზისი არ არის და არ იქნება, არის მხარეთა ვალდებულებები, რომლებიც გამომდინარეობს შეთანხმებებიდან, აღებული ვალდებულებები უნდა შესრულდეს“, — ამბობს მჟანია და განმარტავს, რომ მისი ნათქვამი ეხება კომერციულ საქმის "მთავრობათაშორის" შეთანხმებას, საარბიტრაჟო სასამართლოების გადაწყვეტილების აღიარებასთან დაკავშირებით.

"ჩვენი ეკონომიკა არ მუშაობს ეფექტურად, ჩვენ ვერ მივაღწიეთ ეკონომიკური განვითარების იმ დონეს, რომელიც გვჭირდება მიმდინარე საკითხების მოსაგვარებლად და ინვესტიციების მოზიდვის გარეშე. ეკონომიკა სხვანაირად არ მუშაობს. ჩვენ მხოლოდ რუსეთის ფედერაციიდან შეგვიძლია განვახორციელოთ ინვესტიციები და ინვესტორი მაშინ მოვა ქვეყანაში, როდესაც მისთვის უსაფრთხოების პირობები შეიქმნება და იქნება ბიზნესის კეთების გარანტიები", — განაცხადა ბჟანიამ.