10 აგვისტოს, გამთენიისას, თბილისის საერთაშორისო აეროპორტში, სარეგისტრაციო პროგრამის ხარვეზის გამო, რვა ავიარეისი დაგვიანებით შესრულდა.

როგორც On.ge-სთან საუბარში TAV Georgia-ს პრესსამსახური განმარტავს, დილის ცხრა საათამდე, 22 რეისი იყო დაგეგმილი და აქედან, რვა დაგვიანებით შესრულდა, მათ შორის, სტამბოლის ორი რეისი, ერთი ანტალია, ასევე ათენის, კიევის, შარჯის, ლოტის ვარშავისა და დუბაის რეისები.

აეროპორტის წარმომადგენელი განმარტავს, რომ რეისის დაგვიანების ხანგრძლივობა ერთ საათი და 45 წუთი იყო. TAV Georgia აცხადებს, რომ ამჟამად ყველა რეისი შესრულებულია და სარეგისტრაციო პროგრამის ხარვეზის აღმოფხვრა მიმდინარეობს.

აღნიშნულის შესახებ ინფორმაცია, პარტია ახალი საქართველოს ლიდერმა, გიორგი ვაშაძემ ფეისბუქის საკუთარ გვერდზე გაავრცელა. როგორც ის წერს, აეროპორტში პროგრამის გათიშვის გამო, მგზავრების რეგისტრაცია ხელით მიმდინარეობდა.