12 ივლისიდან ევოლუშენ ჯორჯიას თანამშრომელთა ნაწილი, სამართლიანი ანაზღაურებისა და შრომითი პირობების გაუმჯობესების მოთხოვნით, კომპანიის მიმდებარე ტერიტორიაზე, აქციას მართავს.

ამ პერიოდში მათ პროტესტის სხვადასხვა ფორმას მიმართეს; პირველ ეტაპზე, ევოლუშენში 4 ათასზე მეტი თანამშრომელი გაიფიცა. 13 აგვისტოს გაფიცული თანამშრომლების ნაწილმა შიმშილობა გამოაცხადა, მოგვიანებით, ერთ-ერთმა მათგანმა პროტესტის უკიდურეს ზომას მიმართა და პირი ამოიკერა.

20 სექტემბერს, პროფკავშირ ლაბორმა გაავრცელა განცხადება, სადაც საზოგადოებას გაფიცული თანამშრომლების მხარდაჭერისკენ მოუწოდებს.

განცხადებაში საუბარია, სოციალური პროტესტებისადმი მხარდაჭერის მნიშვნელობაზე, კომპანიაში არსებულ პრობლემებსა და იმ წინააღმდეგობებზე, რაც გაფიცულ თანამშრომლებს მიმდინარე პროცესში შეხვდათ.

განცხადების ტექსტს უცვლელად გთავაზობთ:

"გაფიცვის 72-ე დღეს კაზინო ევოლუშენში გაფიცულებს თქვენი მხარდაჭერა სჭირდება.
კომპანია ბინძური მეთოდებით ცდილობს გაფიცვის შესუსტებას. ის აწარმოებს პროტესტის დისკრედიტაციას; სპეციალურად დაორგანიზებული ჯგუფების მეშვეობით ცდილობს დააპირისპიროს დასაქმებულები ერთმანეთთან.
კომპანიამ ძალისმიერი მეთოდებიც აამუშავა და გაფიცულების შევიწროების მიზნით დაიქირავა ასობით ზონდერი - ადამიანები, რომლებიც რუსული კანონის საწინააღმდეგო პროტესტის დროს მშვიდობიან მოქალაქეებს ქუჩაში დასდევდნენ და სადარბაზოებში ელოდებოდნენ ფიზიკური ანგარიშსწორებისთვის - დღეს დგანან ევოლუშენის მიმდებარე ტერიტორიაზე კომპანიის სადარაჯოდ.
არაპროპორციული ძალებით მიდის ბრძოლა სამართლიანობის აღსადგენად და ეს ბრძოლის გზა კიდევ უფრო მძიმე უსამართლობითაა სავსე.
ძალების გათანაბრებისთვის საზოგადოებას მოგიწოდებთ მხარდაჭერისკენ.
დაუჭირო მხარი გაფიცვას ნიშნავს — დაეხმარო სტუდენტს გადაიხადოს სწავლის საფასური; გადაიხადოს საცხოვრებლის საფასური; არ შეირყიოს ფიზიკური თუ მენტალური ჯანმრთელობა; დარჩეს დრო სწავლა-განვითარებისთვის;
დაუჭირო მხარი გაფიცვას ნიშნავს — იბრძოდე იმისთვის რომ საქართველოს შრომის სტანდარტები დაუახლოვდეს ევროპულს;
დაუჭირო მხარი გაფიცვას ნიშნავს — ათასობით ადამიანში გააქრო ნიჰილიზმის გრძნობა და დაუბრუნო საკუთარი თავის რწმენა;
დაუჭირო მხარი გაფიცვას ნიშნავს — შეამცირო ემიგრაციის რისკები და ხელი შეუწყო ემიგრანტების სამშობლოში დაბრუნებას;
დაუჭირო მხარი გაფიცვას ნიშნავს — გაემიჯნო უსამართლობას, ძლიერის მიერ სუსტის ჩაგვრას და იბრძოლო სამართლიანობისა და ღირსების დასაცავად.
21 სექტემბერს, გაფიცვის ლოკაციაზე — ერისთავის ქუჩაზე, ქვეყნისთვის მნიშვნელოვანი პროცესების დადებითად წარმართვისთვის თქვენი მხარდაჭერა კრიტიკულად მნიშვნელოვანია."