ტრანსგენდერი ქალის, კესარია აბრამიძის მკვლელობაში ბრალდებული 26 წლის ბექა ჯაიანი დუმილის უფლებით სარგებლობს. ამის შესახებ ჯაიანის ადვოკატმა, სალომე არდოტელმა ჟურნალისტებს განუცხადა. მისი თქმით, მკვლელობაში ეჭვმიტანილს ოფიციალურად ჩვენება ჯერ არ მიუცია.

"გასაუბრების შესაძლებლობა მქონდა, თუმცა, კომუნიკაცია, რომელიც ჩვენს შორის შედგა, კონფიდენციალურია. ამ ეტაპზე დუმილის უფლებას იყენებს. ჩვენება არ მიუცია, საქმის მასალებს არ ვიცნობ, ბრალის წარდგენა ხვალ იქნება", — განაცხადა არდოტელმა.

შეგახსენებთ, რომ კესარია აბრამიძე 19 სექტემბერს ღამით, საკუთარ საცხოვრებელ სახლში ცივი იარაღით მოკლეს. მას ათამდე ჭრილობა აქვს მიყენებული. მკვლელობის ფაქტზე სამართალდამცავებმა 26 წლის ბექა ჯაიანი დააკავეს.

გამოძიება სისხლის სამართლის კოდექსის 109-ე მუხლის "თ" და "მ" პუნქტებით მიმდინარეობს, რაც გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობას გულისხმობს.