გასულ კვირას ჰაკერებმა HBO-ს ბაზიდან შოუს რამდენიმე სერია და სცენარები მოიპარეს და გამოსასყიდის გადახდას ითხოვენ.

ჰაკერების განცხადებით მათ 1,5 ტერაბაიტი ინფორმაცია აქვთ.

მოპარული დოკუმენტები მოიცავს როგორც იურიდიულ ინფორმაციას, ასევე თანამშრომლობის ხელშეკრულებებსა და სხვადასხვა სერიალში დაკავებული მსახიობების საკონტაქტო ინფორმაციებს.

როგორც ჰაკერები ამბობენ, მათ სამეფო კარის თამაშების მსახიობების პიტერ დინკლიჯის, ლინა ჰიდის და ემილია კლარკის ტელეფონის ნომრები და სახლის მისამართები აქვთ.

ამ ეტაპზე დოკუმენტაცია საჯარო არ არის, თუმცა ჰაკერები ამბობენ, რომ იმ შემთხვევაში თუ HBO მათ მოთხოვნებს არ დააკმაყოფილებს, ისინი ინფორმაციას გაასაჯაროებენ.

არხი ჯერ-ჯერობით არ აკონკრეტებს თუ რა თანხას ითხოვენ ჰაკერები და HBO-ს ვიცე პრეზიდენტი ამბობს, რომ აღნიშნულ ფაქტთან დაკავშირებით გამოძიება უკვე დაწყებულია.