სელენა გომესმა Vanity Fair-თან ინტერვიუში განაცხადა, რომ ჯანმრთელობის მდგომარეობის გამო შვილების გაჩენას ვერასდროს შეძლებს.

32 წლის მომღერალმა და მსახიობმა ჟურნალთან გულწრფელად ისაუბრა და განაცხადა, რომ მისთვის ის ფაქტი, რომ შვილებს ბიოლოგიურად ვერ გააჩენდა, ძალიან მძიმე აღმოჩნდა და ამ ამბის "გამოგლოვება" დასჭირდა.

"ეს არასდროს მითქვამს, მაგრამ სამწუხაროდ, ვერასდროს დავფეხმძიმდები. ჯანმრთელობის ბევრი ისეთი პრობლემა მაქვს, რომელიც ჩემი და ნაყოფის სიცოცხლეს საფრთხის ქვეშ დააყენებს. ამ ამბის გამოსაგლოვებლად საკმაოდ დიდი დრო დამჭირდა," — თქვა გომესმა.

მომღერალს იშვიათი ავტოიმუნური დაავადება, ლუპუსი სჭირს, რომელიც სხეულის იმუნური სისტემის ჰიპერაქტიურობას იწვევს და ნორმალურ ქსოვილსაც ესხმის თავს. ამ დაავადებამ გომესის პირად და პროფესიონალურ ცხოვრებაზე უდიდესი გავლენა იქონია, რომლის შესახებაც თავის ფანებს ხშირად გულწრფელად უყვება.

მას ასევე ბიპოლარული აშლილობაც სჭირს, რომლის შესახებაც თავის დოკუმენტურ ფილმში My Mind and Me ვრცლად ისაუბრა.

Vanity Fair-თან ინტერვიუში გომესმა ისიც აღნიშნა, რომ მომავალში ძალიან უნდა შვილების ყოლა და სუროგაციას ან ბავშვის აყვანას განიხილავს. "ეს არ არის ის, რაც ოდესმე წარმომედგინა. მეგონა, მეც ისე შევძლებდი შვილის გაჩენას, როგორც ამას ყველა სხვა ახერხებს. ახლა თავს უკეთ ვგრძნობ. მიხარია, რომ არსებობენ ისეთი საოცარი ადამიანები, რომლებიც სუროგაციასა და ბავშვის გაშვილებაზე თანახმანი არიან — ორივე გზა ჩემთვის ოჯახის ყოლის შესაძლებლობაა," — თქვა სელენამ ინტერვიუში.