ოკუპირებულ აფხაზეთში არასამთავრობო ორგანიზაციების საქმიანობა განიხილეს ტელეკომპანია რასია 1-ის გადაცემაში — საღამო ვლადიმის სოლოვიოვთან.

RT-ის ხელმძღვანელმა, მარგარიტა სიმონიანმა "მშობლიურ" აფხაზეთში გატარებული "ხუთი მშვენიერი დღე" გაიხსენა. მან გადაცემაში აფხაზეთის ყოფილი ე.წ საგარეო საქმეთა მინისტრის ინალ არძინბას განცხადებაც გაიმეორა რომელმაც თქვა, რომ USAID-ის საიტზე ორგანიზაციის მიზანნად მითითებულია "აფხაზეთის რეინტეგრაცია საქართველოსთან და კრემლის საზიანო გავლენის შეჩერება".

"აფხაზეთში ათასობით NGO არის, რომელიც ამერიკული ფულით ფინანსდება. ზოგს USAID-ს თავის ვებსაიტზე, დოკუმენტებში მიზნად უწერია აფხაზეთის რეინტეგრაცია საქართველოში და კრემლის მავნე გავლენების შეჩერება. კრემლის მავნე გავლენა, როგორც ჩანს, ფულში გამოიხატება, რომელსაც ექიმებს, მასწავლებლებს, პენსიონერებს ვუხდით, ინვესტიციებში ვდებთ და ა.შ. სხვა სიტყვებით, “ენჯეოშნიკები” აფხაზი ახალგაზრდების კულტურული კოდის შეცვლას ცდილობენ. საწყალი აფხაზეთის პრეზიდენტი კი იბრძვის, შეძლებისდაგვარად. თუმცა, მას ყველაფრის გაკეთება არ შეუძლია. ბოლოსდაბოლოს, პრეზიდენტია, მეფე კი არა.

ყველაზე საშინელი რამ კი არის ის, რომ ამ NGO-ების თანამშრომლების აბსოლუტური უმრავლესობა ჩვენი, რუსეთის ფედერაციის მოქალაქეა. ისინი ცდილობენ, რომ ახალგაზრდებს რუსეთისთვის ზურგი აქცევინონ და ამერიკისკენ მიმართონ", — განაცხადა სიმოანიანმა.

გადაცემის წამყვანმა, ვლადიმერ სოლოვიოვმა დასძინა, რომ მნიშვნელოვანია კანონის მიღება, რათა შესაძლებელი იყოს იმ ადამიანების დაპატიმრება, რომლებიც ამ არასამთავრობო ორგანიზაციებს ეხმარებიან.

შეგახსენებთ, რომ კრემლი რუსეთის მოქალაქეობის ჩამორთმევას გეგმავს ყველა იმ აფხაზი დეპუტატებისა და ოპოზიციონერებისთვის, რომლებიც ე.წ. აპარტამენტების შესახებ კანონპროექტს ეწინააღმდეგებოდნენ. გარდა ამისა, რუსეთმა აფხაზეთს საბიუჯეტო დაფინანსება შეუჩერა, სანამ მათი მოთხოვნები არ იქნება დაკმაყოფილებული.