კინწურაშვილი: გარდამტეხ მომენტებში ყოველი ხელისუფალი ცდილობდა ეკლესიით საკუთარი ძალაუფლების ლეგიტიმაციას ან გამყარებას

2 Sep. 2024, 11:58

"ეკლესია უნდა დარჩეს ავტონომიურ და სუვერენულ ძალად, რათა თავისუფლად შეძლოს, ნებისმიერი ხელისუფალის ჟამს, წინ აღუდგეს უსამართლობას სახარებისეული სიტყვითა და წინასწარმეტყველური ხასიათის ვალდებულებით.

ქართული ოცნების ეს წინასაარჩევნო შეთავაზება არის მართლმადიდებლობით და ზოგადად, სარწმუნოებით მანიპულირების მორიგი წარუმატებელი მცდელობა, რასაც არანაირი კეთილი მიზნები თუ სურვილები არ გააჩნია.

ჩვენი უახლოესი ისტორია გვაჩვენებს, რომ გარდამტეხ მომენტებში ყოველი ხელისუფალი ცდილობდა ეკლესიით საკუთარი ძალაუფლების ლეგიტიმაციას ან გამყარებას. ეს ხდებოდა განსაკუთრებით გარდამავალ ან კრიზისულ მომენტებში. თუმცა საპატრიარქო და პატრიარქი ყოველთვის ცდილობდნენ მკვეთრი პოზიციონირებისაგან თავი შეეკავებინათ. ასე იყო ვარდების რევოლუციის წინა დღეს, როდესაც პატრიარქი არ მივიდა პარლამენტში. ასე იყო 2012 წელს, როდესაც სასულიერო პირები და იერარქები უკვე ღიად აკრიტიკებდნენ ნაციონალურ მოძრაობას.

წარსული მაგალითებიდან გამომდინარე და იმის გათვალისწინებით, რომ კათალიკოსი ილია, მიუხედავად მისი ასაკისა, რჩება დიდი პოლიტიკური წონის და ავტორიტეტის ფიგურად საქართველოში, დღევანდელი ხელისუფლება ცდილობს დაცალოს საპატრიარქო ან ცალკეული იერარქები პოლიტიკური წონისა თუ საჯარო ავტორიტეტისგან, რათა გარდამტეხ მომენტში არ იყოს საფრთხისშემცველი მათი პოზიციები. სწორედ ამიტომ ცდილობს, "სახელმწიფო რელიგიის" ერთგვარი სტატუსით მისცეს ამქვეყნიური პრივილეგიები, რომელიც იმავდროულად მისი, როგორც საზოგადოებაში ყველაზე გავლენიანი რელიგიური ორგანიზმის სახელწმიფოზე სრული დაქვემდებარების ტოლფასია."

ბოლო ამბები:

კომენტარები

კვირის ტოპ-5

გირჩევთ

ახლა კითხულობენ