რუსებმა უკრაინას წუხელ სხვადასხვა ტიპის 10 რაკეტით და Shahed-ის ტიპის 81 დრონით შეუტიეს, — ინფორმაციას უკრაინული მედია საჰაერო ძალების მეთაურზე, გენერალ-ლეიტენანტ ნიკოლაი ოლეშჩუკზე დაყრდნობით ავრცელებს.

ოლეშჩუკის განცხადებით, უკრაინელმა სამხედროებმა 5 ფრთოსანი რაკეტა და 60 დრონი გაანადგურეს.

მისი თქმით, ოკუპანტებმა თავდასხმისას გამოიყენეს Х-47М2 ტიპის 3 აერობალისტიკური რაკეტა, ბალისტიკური რაკეტა "ისკანდერ-მ"-ი, ფრთოსანი რაკეტა "ისკანდერ-კ", "ხ-101" ტიპის 5 ფრთოსანი რაკეტა, Shahed-ის ტიპის 81 უპილოტო საფრენი აპარატი.

"საბრძოლო სამუშაოების შედეგად, საჰაერო თავდაცვამ ჩამოაგდო "ხ-101" ტიპის 5 ფრთოსანი რაკეტა და Shahed-131/136 ტიპის 60 დრონი", — აღნიშნა ოლეშჩუკმა.

მისი თქმით, საბრძოლო სამუშაოები ჩატარდა ქვეყნის ოლქების უმეტესობაში: კიევის, ხმელნიცკის, რივნეს, ვინიცას, ჩერკასის, ხერსონის, ნიკოლაევის, ზაპოროჟიეს, ხარკოვის, დნეპროპეტროვსკის, პოლტავას, ჟიტომირის, სუმის, ჩერნიგოვის და კიროვოგრადის ოლქებში.