დღეს, 22 აგვისტოს, სახალხო დამცველი, ლევან იოსელიანი ევოლუშენის გაფიცულ თანამშრომლებს შეხვდა. შეხვედრას პროფკავშირ ლაბორის თავმჯდომარე, გიორგი დიასამიძეც ესწრებოდა, რომელმაც შეხვედრის დეტალებზე NEWS.On.ge-ს ესაუბრა.

დიასამიძის თქმით, გაფიცულებმა სახალხო დამცველს ინფორმაცია მიაწოდეს ევოლუშენ ჯორჯიას ქმედებების შესახებ, თუ როგორ აორგანიზებს ის ძალადობრივ ჯგუფებს, როგორ ცდილობს მენეჯერების მეშვეობით დასაქმებულების ერთმანეთთან დაპირისპირებას, რომლებიც ასევე ჩართული არიან ამ დივერსიის ორგანიზებაში. გაფიცულმა თანამშრომლებმა ლევან იოსელიანს, ასევე, მიაწოდეს ინფორმაცია სამუშაო პირობებისა და მათ მიმართ დამსაქმებლის დამოკიდებულებაზე.

"სახალხო დამცველმა განაცხადა, რომ დაურეკავდა მინისტრს, დაურეკავდა შრომის ინსპექციას, რომ ისინი აქტიურად ჩაერთონ ამ პროცესებში. მან ასევე თქვა, რომ მანდატიდან გამომდინარე ყველაფერს გააკეთებდა შემათანხმებელი პროცედურების დასაჩქარებლად. მან მოშიმშილეებს თხოვნით მიმართა, რომ შეეწყვიტათ შიმშილობა, თუმცა, გაფიცულებმა ამაზე უარი განაცხადეს“, — აცხადებს დიასამიძე.

მისივე თქმით, სახალხო დამცველს არ დაუკონკრეტებია, რატომ არ ჩაერთო აქამდე პროცესებში და რატომ არ მივიდა გაფიცულებთან სასაუბროდ.

"მანდატიდან გამომდინარე, პოზიტიურად შევაფასებდი მის მოსვლას, ფაქტია, შეშფოთდა ნანახით. ბევრი რამე შესაძლოა არც იცოდა, ბევრი რამის საქმის კურსში იყო, თუმცა ამ ეტაპზე მთავარია, რომ მოვიდა", — ამბობს დიასამიძე.

შეთანხმების მიღწევისთვის აუცილებელია, რომ კომპანიამ დააკმაყოფილოს გაფიცულთა სამართლიანი მოთხოვნები და ხელისუფლებაც ჩაერთოს სიტუაციის დასტაბილურებასა და მოგვარებაში.

"მოკლედ, პროცესი ასეთია, ეს პროცესი შეჩერდება მაშინ, როცა შეთანხმება შედგება," — ამბობს ლაბორის წარმომადგენელი.

ლაბორის წევრმა გაფიცულთა განწყობაზეც ისაუბრა. მისი თქმით, რადიკალური პროტესტის შეწყვეტის მოთხოვნის მიუხედავად, ისინი მაინც მტკიცედ დგანან თავიანთ აზრზე და გააგრძელებენ პროტესტს, სანამ მათი მოთხოვნები არ დაკმაყოფილდება.

ევოლუშენის გაფიცულ მოშიმშილეებთან შეხვედრის შემდეგ, სახალხო დამცველმა გაავრცელა ინფორმაცია. სადაც ის კიდევ ერთხელ მოუწოდებს შპს ევოლუშენ ჯორჯიას, შრომის კანონმდებლობით დადგენილი მოთხოვნების შესაბამისად, დაუყოვნებლივ დაიწყოს გაფიცულ დასაქმებულებთან თანამშრომლობა და უზრუნველყოს შემათანხმებელი პროცედურების დროული და ეფექტიანად წარმართვა.

განცხადებაში ასევე ნათქვამია, რომ სახალხო დამცველმა გაფიცულ დასაქმებულებს მხარდაჭერა აღუთქვა და დაჰპირდა, რომ მათგან მიღებულ ინფორმაციას სრულად მიაწვდის შესაბამის სახელმწიფო უწყებებს.