რადგან brat ზაფხული უკვე კარგა ხანია, უკან მოვიტოვეთ, ინტერნეტის მორიგი ტრენდის ახსნის ჯერიც დადგა. მეტიც, როგორც ამბობენ, სწორედ ამ ახალმა ტრენდმა დაჩრდილა Charli XCX-ის უახლეს ალბომს მოყოლილი ციებ-ცხელება.

ტიკტოკს თუ აქტიურად ადევნებ თვალს, ბოლო დღეებში შენს ყურადღებას აუცილებლად მიიქცევდა ხშირად გამეორებული ინგლისური ფრაზა: "Very mindful, very demure". სიტყვასიტყვით, ეს ითარგმნება, როგორც "ძალიან გააზრებული, ძალიან მოკრძალებული". ყველაფერი კი ერთი ვიდეოთი დაიწყო...

ტიკტოკმომხმარებელმა ჯულს ლებრონმა 2 აგვისტოს გამოაქვეყნა ვიდეო, რომელშიც გამომწერებს თავის ვარცხნილობას და მაკიაჟს აჩვენებდა.

"ხედავთ, როგორ მოვედი სამსახურში? ძალიან მოკრძალებულად", — ამბობს ჯულსი, რომელმაც რამდენიმე დღის შემდეგ იმავე ფრაზის გამოყენებით ახალი ვიდეო ჩაწერა. ამ დროისთვის ტიკტოკმა მისი საფირმო სიტყვები უკვე აიტაცა, ვიდეოებმა კი უმოკლეს დროში მილიონობით ნახვა დააგროვა.

მას შემდეგ, ვარსკვლავად ქცეულმა ტიკტოკერმა რჩევების გაცემაც დაიწყო — მაგალითად, როგორ გამოვცხადდეთ "მოკრძალებულად" სამსახურში. თუმცა, საქმე ისაა, რომ სიტყვა "demure" ლებრონისეული გაგებით მთლად "მოკრძალებულს" არ ნიშნავს.

და მაინც, რა არის demure?

მერიემ-უებსტერის ლექსიკონს თუ გადაშლი, ის გეტყვის, რომ ზედსართავი სახელი demure შეიძლება განიმარტოს, როგორც "უთქმელი, მოკრძალებული", ან "მოჩვენებითად მოკრძალებული, უთქმელი, თავდაჭერილი და მორცხვი". იქვე ვხვდებით საინტერესო ცნობას ამ სიტყვაზე: ფრანგული ჟღერადობის მიუხედავად, მისი წარმომავლობის ისტორია თურმე ბუნდოვანია. მას უკვე თითქმის შვიდი საუკუნეა, ინგლისურ ენაში იყენებენ და ამ ხნის განმავლობაში სიტყვის მნიშვნელობა დიდად არ შეცვლილა. რა თქმა უნდა, სანამ ტიკტოკერი ჯულს ლებრონი გამოჩნდებოდა...

მართალია, demure-ს ჯულსიც იმის აღსაწერად იყენებს, თუ როგორი სადა, არამყვირალა მაკიაჟით გამოცხადდა სამსახურში, მაგრამ მის შემდგომ ვიდეოებში ამ ფრაზის შინაარსი ოდნავ შეიცვალა. ის უფრო მიუთითებს დახვეწილობაზე, ელეგანტურობაზე, მოხდენილობაზე. mindful ("გააზრებული, გაცნობიერებული") კი ალბათ იმაზე უსვამს ხაზს, რომ ამ ყველაფერს შეგნებულად აკეთებ.

Very mindful, very demure

ჯულს ლებრონის ყველაზე პოპულარულ ვიდეოს ამ დროისთვის 43 მილიონამდე ნახვა და 4,2 მილიონზე მეტი მოწონება აქვს. ტიკტოკერის ამ ფრაზის აუდიო ვერსია კი 72 ათასზე მეტ სხვა ვიდეოშია გამოყენებული. ფრაზის პოპულარობა ერთ კონკრეტულ პლატფორმასაც გასცდა და სხვა სოციალური ქსელები მოიცვა. თანაც, მას არა მხოლოდ რიგითი ინტერნეტმომხმარებლები, დიდი კომპანიები და ცნობილი ადამიანებიც კი იყენებენ.

მაგალითად, გერმანიის კანცლერმა ოლაფ შოლცმა, ლებრონის მსგავსად, ვიდეო გამოაქვეყნა, როგორ მიდის სამსახურში "ძალიან მოკრძალებულად". ტრენდს არც აშშ-ის პრეზიდენტი ჯო ბაიდენი არ ჩამორჩა და ლებრონის ფრაზა თეთრი სახლის ინსტაგრამგვერდზე გამოჩნდა.

"Very mindful, very demure" — ამ ერთმა ჩვეულებრივმა ფრაზამ ჯულს ლებრონის ცხოვრება სრულიად შეცვალა. იგი ვიზაჟისტი და ინფლუენსერია, რომელიც აქამდე ვიდეოებში "პლუს-ზომის ტრანსგენდერი ქალის" ცხოვრებაზე, თავისი მოწოდებისა და იდენტობის ძიებაზე ჰყვებოდა ხოლმე. ერთ-ერთ უახლეს ვიდეოში ატირებული ტიკტოკერი ამბობს, რა შეცვალა მის ყოველდღიურობაში უცაბედმა პოპულარობამ.

"იქნებ თავადაც გადაიღოთ ხოლმე ვიდეოები, რადგან მე ერთ დღეს მოლარე გახლდით და შესვენებებზე ვიდეოებს ვწერდი ხოლმე, ახლა კი ქვეყნის მეორე ბოლოში მივფრინავ, რომ ღონისძიებები ჩავატარო. უკვე იმის საშუალებაც მაქვს, ჩემი ტრანზიცია ბოლომდე მივიყვანო", — აღნიშნავს ლებრონი.