მექანიზაციის ქუჩაზე პროტესტი 41-ე დღეა გრძელდება — გაფიცული თანამშრომლები, ხელფასების ზრდას, შრომითი პირობების გაუმჯობესებას და ღირესულ სამუშაო გარემოს შექმნას ითხოვენ.

პროტესტის მონაწილეები, ხელისუფლებას მოუწოდებენ დაუყონებლივ ჩაერიონ მიმდინარე პროცესებში.

NEWS.On.ge გაფიცვის ერთ-ერთ მონაწილეს, თამარ ანსიანს ესაუბრა რომელიც უკვე მე-9 დღეა შიმშილობს. ანსიანის თქმით, კომპანიასთან მოლაპარაკებებს თითქმის ორი წელი ცდილობდნენ, თუმცა ამ ყველაფერმა შედეგი ვერ გამოიღო და საჭირო გახდა რადიკალური ქმედებები.

"ჩვენ ორი წელია ვსაუბრობთ ამ პრობლემებზე, ორი წელია ვცდილობთ მოლაპარაკებებს კომპანიის წარმომადგენლებთან, მაგრამ ვიღებთ იგნორს. ეს რადიკალური პროტესტიც (გაფიცვა/შიმშილობა/პირის ამოკერვა) დაგროვილი ბრაზის შედეგია. სახელმწიფო ვალდებულია ჩაერთოს მიმდინარე პროცესებში და ამ ქვეყნის მოქალაქეებს სათანადო ყურადღება მოგვაქციოს!" — ამბობს თამარ ანსიანი.

19 აგვისტოს, კომპანია ევოლუშენმა მორიგი განცხადება გაავრცელა და აღნიშნა, რომ იძულებულები არიან დაიწყონ თანამშრომლების შემცირების პროცესი.

ვრცლად იხილეთ: ევოლუშენ ჯორჯია: კომპანია იძულებულია, განახორციელოს შემცირებები, რაც განსაკუთრებით სამწუხაროა

გაფიცულებმა, ევოლუშენის განცხადება პროტესტში ჩართული თანამშრომლების შანტაჟის მცდელობად შეაფასეს.

NEWS.On.ge-სთან საუბარში, თამარ ანსიანი ამბობს, რომ კომპანიის წარმომადგენლებისა და სახელმწიფო უწყებების სრული იგნორის ფონზე, ერთ-ერთმა მოშიმშილემ გადაწყვიტა რადიკალური ზომებისთვის მიემართა და თუ 20 აგვისტოს, დღის ბოლომდე რაიმე ტიპის გამოხმაურება არ იქნებოდა (ხელისუფლების ან კომპანიის მხრიდან) პროტესტის ნიშნად პირს ამოიკერავდა.

სამწუხაროდ, ამგვარი გამოხმაურება არ ყოფილა. მოშიმშილე თანამშრომელმა 21 აგვისტოს პირი ამოიკერა.

ცნობისთვის, სოციალური სამართლიანობის ცენტრმა შვედურ მხარეს ევოლუშენ ჯორჯიას წინააღმდეგ სარჩელით მიმართა. ორგანიზაციის ცნობით, წარდგენილი საჩივარი შეეხება კომპანია ევოლუშენის მიერ, საქართველოში საქმიანობისას, "მულტიეროვნული კორპორაციებისთვის პასუხისმგებლობიანი ბიზნეს საქმიანობის შესახებ" OECD-ის სახელმძღვანელო პრინციპებით განსაზღვრული სტანდარტების უხეშ დარღვევას.

"შვედეთის ეროვნულ საკონტაქტო უწყებაში წარდგენილი საჩივარი ეხება კომპანია ევოლუშენ ჯორჯიას მიერ, რომელიც შვედური კორპორაციის აფილირებული კომპანიაა, შრომითი უფლებების მასობრივ დარღვევას, მათ შორის, შრომის დაბალ ანაზღაურებას, ჯანმრთელობისთვის შეუსაბამო სამუშაო გარემოსა და პირობებს, ანტისანიტარიასა და ჰიგიენის ნორმების დაუცველობას სამუშაო სივრცეში, კომპანიის მენეჯმენტის მხრიდან თანამშრომლებისადმი შეურაცხმყოფელ დამოკიდებულებასა და კომპანიაში არსებულ შრომის პირობებთან დაკავშირებულ სხვა არაერთ პრობლემას, რომელიც უხეშად არღვევს OECD-ის სტანდარტებს.

უფრო ზუსტად კი, სახელმძღვანელო პრინციპების თანახმად, იმ შემთხვევებში, როდესაც მულტიეროვნული კორპორაციები ოპერირებენ განვითარებად ქვეყნებში, მათ უნდა უზრუნველყონ ადგილობრივი კანონმდებლობის შესაბამისი, ადეკვატური შრომის პირობები, მათ შორის, შრომის ანაზღაურება და მიიღონ სათანადო ზომები დასაქმების ადგილზე ჯანმრთელობისა და უსაფრთხოების ნორმების დასაცავად", — ნათქვამია განცხადებაში.