ბრიტანელი მსახიობი და ნეტფლიქსის სერიალ Stranger Things-ის ვარსკვლავი, მილი ბობი ბრაუნი, თავისი სადებიუტო რომანის კინოადაპტაციის გადაღებას აპირებს.

ბრაუნის წიგნის ეკრანიზაციას, რომლის ერთ-ერთი პროდიუსერიც თავადვე იქნება, ასევე ნეტფლიქსზე ვიხილავთ. მსახიობს სტრიმინგ კომპანიასთან მჭიდრო კავშირი აქვს: გახმაურებული Stranger Things-ის გარდა, იგი მონაწილეობდა ნეტფლიქსის სერიალ Enola Holmes-ში და ფენტეზი ფილმში Damsel. გამოცემა Deadline-ის ცნობით კი, ბრაუნმა შეიძლება თავისი ნაწარმოების ეკრანიზაციაშიც ითამაშოს.

ფოტო: Etienne Laurent / Shutterstock

რაც შეეხება მსახიობის წიგნს, რომანი, სახელწოდებით Nineteen Steps ("ცხრამეტი ნაბიჯი"), 2023 წლის შემოდგომაზე გამოიცა. ნაწარმოებში მოქმედება მეორე მსოფლიო ომის პერიოდში ვითარდება, მისი სიუჟეტი კი ბრაუნის ბებიის ცხოვრებას ეფუძნება. ამბის მთავარი გმირი ლონდონში მცხოვრები 18 წლის ნელი მორისია, რომელსაც ამერიკელი პილოტი უყვარდება. მსახიობთან ერთად, რომანზე იმუშავა "გოსთრაითერმა" (გამოცდილი ავტორი, რომელიც სხვისი სახელით გამოსაცემ ტექსტს წერს).

აი, წიგნის ეკრანიზაციისთვის კი, სცენარს ენტონი მაკ-კარტენი დაწერს, რომელსაც ისეთ წარმატებულ პროექტებზე უმუშავია, როგორიცაა ფრედი მერკურიზე გადაღებული ბიოგრაფიული ფილმი Bohemian Rhapsody.

20 წლის მილი ბობი ბრაუნი, რომელსაც საყოველთაო პოპულარობა Stranger Things-ში შესრულებულმა ილევენის როლმა მოუტანა, უკვე ემის ორგზის ნომინანტია. ჟურნალმა Time-მა 2018 წელს ბრაუნი მსოფლიოს 100 ყველაზე გავლენიან ადამიანს შორისაც დაასახელა.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...