რუსეთის ხელისუფლებამ, ჰოლივუდის მსახიობის ჯორჯ კლუნის უფლებადამცველი არასამთავრობო ორგანიზაცია, კლუნის ფონდი სამართლიანობისთვის დისკრედიტაციაში დაადანაშაულა.

დღეს, 19 აგვისტოს, რუსეთის გენერალურმა პროკურატურამ გამოაქვეყნა გადაწყვეტილება, სადაც კლუნის ფონდი რუსეთის ტერიტორიაზე "არასასურველ ორგანიზაციად" არის გამოცხადებული.

პროკურატურის განცხადებით, ფონდი მხარს უჭერს " ქვეყნიდან [რუსეთიდან] წასულ ცრუპატრიოტებს", ისევე როგორც აკრძალული ექსტრემისტული გაერთიანებების მონაწილეებს და ტერორისტულ ორგანიზაციებს.

"ჰუმანიტარულ იდეებს ამოფარებული" ორგანიზაცია ხელს უწყობს რუსეთის უმაღლესი ხელმძღვანელობის სისხლისსამართლებრივი დევნის ინიციატივებს, საჯაროდ ტირაჟირებს ნეგატიურ, ფსევდოექსპერტულ შეფასებებს რუსეთის კანონმდებლობაზე, უცხოური აგენტებისა და არასამთავრობო ორგანიზაციების შესახებ" — წერია რუსეთის გენპროკურატურის Telegram არხზე გამოქვეყნებულ პრესრელიზში.

ფონდი, რომელიც 2016 წელს დააფუძნა ჯორჯ კლუნიმ, და მისმა იურისტმა ცოლმა ამალი კლუნიმ, მსოფლიოს 40-ზე მეტ ქვეყანაში უფასო იურიდიულ დახმარებას უწევს უფლებაშელახულ ადამიანებს.

2022 წელს, უკრაინაში რუსეთის ფართომასშტაბიანი შეჭრის შემდეგ, კლუნის ფონდმა რუსი მაღალჩინოსნების წინააღმდეგ არაერთი სარჩელი მოამზადა და ომის შესაძლო დანაშაულთა გამოძიებაც დაიწყო.