მწვერვალ შხელდაზე დაღუპული მთამსვლელი არჩილ ბადრიაშვილია — ის სავარაუდოდ მეხის დაცემის შედეგად გარდაიცვალა. შემთხვევა გუშინ, 11 აგვისტოს მოხდა.

არჩილ ბადრიაშვილი ალპინიზმის უმაღლესი ჯილდოს მფლობელი იყო. ის 2022 წელს "ოქროს წერაყინის" გამარჯვებული გიორგი ტეფნაძესთან და ბაქარ გელაშვილთან ერთად გახდა. ქართველმა სპორტსმენებმა პრიზი პაკისტანის აქამდე დაუპყრობელ მწვერვალ სარაგარზე ასვლის გამო მიიღეს.

შსს-ს მიერ გავრცელებული ინფორმაციით, მაშველებმა, სვანეთში, მწვერვალ შხელდაზე მყოფი სამი მთამსვლელი უვნებლად, სასაზღვრო პოლიციის ვერტმფრენის დახმარებით მესტიაში გადმოიყვანეს, მეოთხე პირს კი ეძებდნენ.

"მთამსვლელების ინფორმაციით, მწვერვალზე მყოფი ერთ-ერთი პირი სავარაუდოდ მეხის დაცემის შედეგად გარდაიცვალა. მეტეოროლოგიური პირობების გაუარესების გამო კი, დარჩენილი სამი პიროვნება ვერ ახერხებდა დამოუკიდებლად გადაადგილებას და სამაშველო ჯგუფის დახმარება მოითხოვეს", — განაცხადა შსს-მ.