დღეს, სენატორი ჯინ შაჰინი და კონგრესმენი მაიკ ტერნერი საქართველოს ოფიციალური ვიზიტით ეწვევიან. — ინფორმაციას საქართველოში ამერიკის საელჩო ავრცელებს.

საელჩოს ცნობით, ორპარტიული ვიზიტის ფარგლებში ისინი შეხვდებიან საქართველოს მთავრობის, სამოქალაქო საზოგადოების, კერძო სექტორისა და პოლიტიკური პარტიების წარმომადგენლებს. ასევე, სენატორი და კონგრესმენი გაეცნობიან აშშ-ის მთავრობის პროგრამებს, რომელიც მხარს უჭერს იძულებით გადაადგილებულ პირებს, მეწარმეებსა და სტუდენტებს.

საელჩო აღნიშნავს, რომ შეერთებული შტატები კვლავ რჩება ქართველი ხალხის დემოკრატიული მისწრაფებების მტკიცე მხარდამჭერი.

"შეერთებული შტატები რჩება სრულად ჩართული და ერთგული საქართველოს ხალხისა და მათი ევროატლანტიკური მისწრაფებების მხარდაჭერაში" — წერს შეერთებული შტატების საელჩო საქართველოში.

ცნობისთვის, ჯო ბაიდენმა დღეს საქართველოს პრეზიდენტს სალომე ზურაბიშვილს ვრცელი წერილი გაუგზავნა, სადაც მან ხაზგასმით აღნიშნა, რომ იმედგაცრუებულია საქართველოს მთავრობის ანტიდემოკრატიული ქმედებების გამო.

ამავე თემაზე:

ბაიდენი ზურაბიშვილს: იმედგაცრუებული ვარ საქართველოს მთავრობის ანტიდემოკრატიული ქმედებებით