დღეს, 31 ივლისს, დეზერტირების ბაზარში დასაქმებულებმა საავტომობილო მაგისტრალი გადაკეტეს.

დასაქმებულები მეორე დღეა ბაზრის დახურვის და მშენებლობის დაწყების გადაწყვეტილებას აპროტესტებენ.

დეზერტირების ბაზარში დასაქმებულები ტელეკომპანია პირველთან აცხადებენ, რომ ტერიტორიის დატოვებას არ აპირებენ, რადგან ეს მათთვის შემოსავლის ერთადერთი წყაროა, ხოლო რაც შეეხება ალტერნატიულ სივრცეს დიღმისა და სამგორის ბაზრის ტერიტორიაზე, რომელიც მოვაჭრეებს შესთავაზეს, მათთვის მიუღებელია.

"შენობა ავარიული არ არის. თუ მათ აწყობთ, რომ ავარიული იყოს და ამ სახელით იმოქმედონ, სხვა საქმეა. უნდა დადგინდეს, რომ ეს [შენობა] ავარიულია. ბაზარი იყო ხალხის და უნდა დარჩეს ხალხს. ვერავინ ვერ გაყიდის ორ დღეში საქონელს, ამიტომ ბაზარი უნდა დაგვრჩეს ჩვენ", — აცხადებს ერთ-ერთი მოვაჭრე.

გუშინ, 30 ივლისს, ცნობილი გახდა, რომ დეზერტირების ბაზარი, დაგეგმილი მშენებლობის გამო, 6 თვით იკეტება.

ბაზრის ტერიტორიაზე ორსართულიანი სავაჭრო ცენტრის აშენების ნებართვა უკვე გაცემულია.

გაიგე მეტი: დეზერტირების ბაზარი 6 თვით იკეტება — მოვაჭრეებმა გზა გადაკეტეს