ფრანგმა დიჯეიმ და აქტივისტმა, ბარბარა ბუჩმა, რომელიც პარიზის ოლიმპიადის გახსნის ცერემონიის ერთ-ერთ განხილვად სცენაში მონაწილეობდა, სიკვდილის მუქარების მიღების გამო პოლიციას მიმართა. ბუჩმა ინსტაგრამზე თავისი ადვოკატის განცხადება გააზიარა, სადაც ნათქვამია, რომ აქტივისტი "კიბერბულინგისა და ცილისწამების უკიდურესად ძალადობრივი კამპანიის სამიზნედ" იქცა.

"მას მოკვლით, წამებითა და გაუპატიურებით დაემუქრნენ", — აღნიშნულია ბუჩის ადვოკატის განცხადებაში, — "იგი ასევე გახდა ანტისემიტური, ჰომოფობიური, სექსისტური და გროსოფობიური თავდასხმების სამიზნე. [...] დღეს ის ამზადებს რამდენიმე სარჩელს ამ ქმედებების წინააღმდეგ, რომელთა უკანაც, მნიშვნელობა არ აქვს, საფრანგეთის მოქალაქე დგას თუ უცხოელი; იგი აპირებს სამართლებრივ პასუხისგებაში მისცეს ყველა, ვინც მომავალში მის დაშინებას შეეცდება".

ბარბარა ბუჩი, როგორც ვთქვით, ოლიმპიადის გახსნის ერთ-ერთი ყველაზე საკამათო სცენის მონაწილე გახლდათ. სცენა, რომელშიც დრეგ ქვინები მონაწილეობდნენ, მაყურებელთა ნაწილმა ლეონარდო და ვინჩის ფრესკას, საიდუმლო სერობას, მიამსგავსა და ქრისტიანობის დაცინვად აღიქვა. ამგვარი შეფასება გააჟღერა, მათ შორის, საფრანგეთის კათოლიკე ეკლესიამ, ეგვიპტის ანგლიკანურმა ეკლესიამ, რუსეთის საგარეო საქმეთა სამინისტროს პრესსპიკერმა და რამდენიმე კონსერვატორმა პოლიტიკოსმა.

ოლიმპიური თამაშების ორგანიზატორების, ასევე გახსნის ცერემონიის შემოქმედებითი ხელმძღვანელის, ტომა ჟოლის თქმით, სცენა და ვინჩის ფრესკას არ უკავშირდებოდა. ჟოლიმ განაცხადა, რომ მისი ინსპირაცია ძველბერძნული მითოლოგია და დიონისეს ღვთაება იყო.