სახელმწიფო უსაფრთხოების სამსახური (სუსი) აცხადებს, რომ აწარმოებს გამოძიებას ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე.

მათი ინფორმაციით, თავდასხმას აფინანსებენ და ორგანიზებას უწევენ უკრაინაში მყოფი, საქართველოს ხელისუფლების ყოფილი მაღალჩინოსნები და ძალოვანი უწყებების ყოფილი თანამშრომლები.

თავდასხმის მიზანი კი ქართული ოცნების საპატიო თავმჯდომარის, ბიძინა ივანიშვილის მკვლელობაა.

"ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.

სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით", — ნათქვამია სუს-ის განცხადებაში.

ბოლო რამდენიმე დღის განმავლობაში უწყებამ ამ საქმეზე გამოკითხა საქართველოს მოქალაქეები, რომლებიც უკრაინაში იბრძოდნენ.

გაიგე მეტი: ადვოკატის თქმით, უკრაინაში მებრძოლებს სუსი უსვამს კითხვებს ივანიშვილისა და სხვა მაღალჩინოსნების წინააღმდეგ ტერაქტის მომზადებაზე