დღეს, 23 ივლისს, სახელმწიფო უსაფრთხოების სამსახურმა, ტერორიზმის და შეთქმულების მომზადების საქმეზე, 2008 წლის აგვისტოს ომისა და აფხაზეთის ომის ვეტერანი, უკრაინაში რუსეთის წინააღმდეგ მებრძოლი გელა კახაბრიშვილი გამოჰკითხა.

კახაბრიშვილის ადვოკატის, მიხეილ რამიშვილის განცხადებით, სუს-ის კითხვები ქართული ოცნების საპატიო თავმჯდომარის, ბიძინა ივანიშვილისა და ოცნების მაღალჩინოსნების მიმართ ტერორისტული აქტის მომზადებას ეხებოდა.

"კითხვებიდან გამომდინარე, თითქოსდა იგეგმება მაღალჩინოსანი პოლიტიკოსების წინააღმდეგ ტერორისტული აქტის მომზადება. მათ შორის, გამომძიებელმა ახსენა კონკრეტული სახელი და გვარი, ის ადამიანები, რომლებიც დღეს წარმოადგენენ ოცნების მაღალ ეშელონებს. იყო საუბარი და დასახელდა ოცნების საპატიო თავმჯდომარე, ბიძინა ივანიშვილი", — განაცხადა რამიშვილმა მედიასთან კომენტარში.

მისივე თქმით, მისი დაცვის ქვეშ მყოფებს ეკითხებიან, ხომ არ აპირებს ტერორისტულ აქტებში და სახელმწიფო გადატრიალებაში მონაწილეობას:

"ჰკითხეს , თუ ჰქონდა კომუნიკაცია ისეთ ადამიანთან, როგორიც არის მამულაშვილი [მამუკა მამულაშვილი, ქართული ლეგიონის მეთაური] და ეგეთ ადამიანებთან. ძირითადად, მათთან, ვინც უკრაინაშია და ხომ არ აქვთ ჩემი დაცვის ქვეშ მყოფებს ურთიერთობები სხვა ქვეყნის სადაზვერვო სამსახურის წევრებთან. დარწმუნებული ვარ, საქართველოში არანაირი ტერორისტული აქტი არ მოხდება".

ბოლო დღეების განმავლობაში, უკრაინაში მებრძოლ ქართველებისა და ომის ვეტერანების ნაწილს სუსი გამოკითხვაზე იბარებს.

გუშინ, 22 ივლისს, უწყებაში იმყოფებოდა ნადიმ ხმალაძე, რომელიც უკრაინაში იბრძვის და ამასთან, რუსული კანონის საწინააღმდეგო აქციების აქტიური მონაწილეა.

მთავარის ინფორმაციით, სუს-ისგან შეტყობინება გამოკითხვის შესახებ მიიღეს ომის სხვა ვეტერანებმაც — ვაჟა ცეცაძემ, ბესო ბენდელიანმა და ლაშა ჭიღლაძემ. ისინი ამბობენ, რომ საქმეს რეალური სამართლებრივი საფუძველი არ აქვს და დარწმუნებულები არიან, რომ ხელისუფლებას მათი დასჯა რუსულ აგრესიასთან ბრძოლისა და თბილისში საპროტესტო აქციებში მონაწილეობის გამო სურს.

გაიგე მეტი: რა საკითხზე იბარებს სუს-ი უკრანაში მებრძოლ ქართველებს — დღეს ნადიმ ხმალაძე გამოკითხეს