ამერიკის შეერთებული შტატების ვიცე-პრეზიდენტმა, მაიკ პენსმა, რომელიც საქართველოში ოფიციალური ვიზიტით იმყოფება, გიორგი კვირიკაშვილთან ერთად დღეს გამართულ პრესკონფერენციაზე ყურადღება გაამახვილა საქართველო-ამერიკის სტრატეგიულ პარტნიორობასა და საქართველოს კულტურის სიმდიდრეზე:

ძალიან დიდი პატივი იყო თქვენი სტუმრობა თეთრ სახლში და ჩემი ვიზიტი ამ ისტორიულ ქვეყანაში. პრეზიდენტ დონალდ ტრამპის გზავნილი გახლავთ, რომ ჩვენ მხარს გიჭერთ, თქვენს გვერდზე ვდგავართ, ქართველი ხალხის გვერდზე. მე შემიძლია ასევე ვთქვა: ის, რომ ამერიკა ნომერ პირველია, ეს არ გულისხმობს იმას, რომ ამერიკა მარტო დგას ამ გზაზე. ამერიკა ქართველი ხალხის გვერდზე დგას.

მე მინდა ხაზი გავუსვა, რომ საქართველოს მოსახლეობის გმირობა ყოველთვის შთაბეჭდილებას ახდენდა ჩემზე. საქართველო იმყოფებოდა ხალხთა საპყრობილეში საბჭოთა კავშირში. შემდეგ დაიმსხვრა ეს სასტიკი რეჟიმი.

ჩვენ მზად ვართ, კიდევ უფრო დავუახლოვდეთ საქართველოს, კიდევ უფრო ჩავწვდეთ მის შემართებას, კიდევ უფრო გავამყაროთ ჩვენი ურთიერთობები, ჩვენი ძალისხმევის სრული რეალიზაცია მოვახდინოთ, რათა გამყარდეს თანამშრომლობა უსაფრთხოებისა სტრატეგიული თანამშრომლობის მიმართულებით. საქართველო გახლავთ ამერიკის სტრატეგიული პარტნიორი. უკვე ათწლეულებია, ქართველი სამხედრო მოსამსახურეები ამერიკელებთან ერთად იბრძვიან კოსოვოში, ერაყში, ავღანეთში. რაც შეეხება ავღანეთს, საქართველომ ერთ სულ მოსახლეზე უფრო მეტი ჯარისკაცი გადაისროლა იქ, ვიდრე ნებისმიერი სხვა ქვეყნის წარმომადგენელმა. საქართველოს 31-მა მოქალაქემ თავისი სიცოცხლე შესწირა ამ ომს. მათი ხსოვნა ამერიკელების გულში დარჩება. ამერიკელები ქართველებთან ერთად გლოვობენ მათ დაღუპვას".

მაიკ პენსის თქმით, სამხედრო წვრთნა "ღირსეული პარტნიორი" საქართველოს თავდაცვისუნარიანობის გაძლიერებას ემსახურება და ეს არის ამერიკის მთავრობის დახმარების ერთ-ერთი გამოხატულება.

"პრეზიდენტი ტრამპი და მე მხარს ვუჭერთ 2008 წლის ბუქარესტის სამიტის განცხადებას, რომ საქართველო გახდება ნატოს წევრი. ასევე, ძალიან შთამბეჭდავია, რომ საქართველო თავდაცვის სფეროში მთლიანი შიდა პროდუქტის ორ პროცენტს ხარჯავს და ამით ნატოს ზოგ წევრს ასწრებს, თუმცა ეს მძიმე რეალობით არის გამოწვეული. რუსული ტანკები აქედან, სულ რაღაც, 40 კილომეტრის მოშორებით გახლავთ განლაგებული, საქართველოს 20 პროცენტი ოკუპირებულია და მე ხაზს ვუსვამ, რომ აშშ მკაცრად გმობს რუსეთის მიერ საქართველოს ოკუპაციას. აშშ მტკიცე მხარდაჭერას უცხადებს საქართველოს ტერიტორიულ მთლიანობას. დონალდ ტრამპის ადმინისტრაცია ყოველთვის მკაცრ პასუხს გასცემს იმ ქვეყნებს, რომლებსაც პრეტენზია ექნებათ, ხელყონ საქართველოს სუვერენიტეტი და ტერიტორიული მთლიანობა".

მაიკ პენსმა ახსენა რუსეთის მიმართ ახალი სანქციების დაწესების ფაქტი და აღნიშნა, რომ აშშ-ს სურს რუსეთთან ურთიერთობების გაუმჯობესება ოღონდ მას შემდეგ, რაც რუსეთი შეწყვეტს დესტრუქციულ ქმედებებს.

აშშ-ს ვიცე-პრეზიდენტის თქმით, აშშ საქართველოსთან გაამყარებს ურთიერთობებს, მათ შორის, ბიზნესის მიმართულებით. პენსმა ხაზი გაუსვა ანაკლიის პორტში ამერიკული ინვესტიციის შემოსვლის მნიშვნელობას.

მაიკ პენსი საქართველოს 31 ივლისს ორდღიანი ვიზიტით ცოლთან ერთად ეწვია.