ამერიკის შეერთებული შტატების ვიცე-პრეზიდენტი მაიკ პენსი თბილისში დღეს დილით შეხვდა ოთხი ოპოზიციური პარტიის წარმომადგენელს. შეხვედრას ესწრებოდნენ დავით უსუფაშვილი - შენების მოძრაობა, დავით ბაქრაძე - ევროპული საქართველო, ნიკა მელია - ერთიანი ნაციონალური მოძრაობა და შალვა შავგულიძე - თავისუფალი დემოკრატები.

ოპოზიციის წარმომადგენლებმა შეხვედრის შემდეგ მედიას უთხრეს, რომ საუბარი მაიკ პენსთან, შეეხებოდა როგორც საქართველოს შიდა დემოკრატიულ პროცესებს, ისე - ქვეყნის ინტეგრაციას ევრო-ატლანტიკურ სივრცეში.

"საუბარი იყო ქვეყანაში მიმდინარე პროცესებზე, მათ შორის, საკონსტიტუციო რეფორმაზე, საარჩევნო რეფორმაზე, მათ შორის ზოგადად იმ პროცესებზე, რაც ქვეყანაში მიდის, სიტყვის თავისუფლებაზე და რუსთავი 2-ზეც. ჩვენი პოზიცია და ჩვენი ამერიკელი პარტნიორების პოზიცია სრულად ემთხვევა ერთმანეთს, რომ სწორედ დემოკრატიული საქართველო არის ის საქართველო, რომელსაც ექნება მაქსიმალური მხარდაჭერა, რომელიც იპოვის თავის ადგილს ევრო-ატლანტიკურ სივრცესა და ნატოში, რომელიც შეძლებს თავი დაიცვას რუსული აგრესიისგან. ამიტომ, ქართული დემოკრატია არ არის მხოლოდ ქართული პოლიტიკის შიდა საქმე. ქართული დემოკრატია არის რეცეპტი და წამალი ყველა ჩვენი პრობლემის წინააღმდეგ. სწორედ დემოკრატიულ საქართველოს დაიცავს საერთაშორისო სამყარო რუსული აგრესიისგან", - უთხრა დავით ბაქრაძემ ჟურნალისტებს.

დავით უსუფაშვილის თქმით, მაიკ პენსმა ყურადღებით მოუსმინა ოპოზიციას:

"ყველა საკითხს შევეხეთ მათ შორის უსაფრთხოების, დემოკრატიის, ეკონომიკური განვითარების. მე შევთავაზე ბატონ ვიცე-პრეზიდენტს, რომ შევთანხმდეთ ფორმულაზე: თუ ამერიკა არის მათი მხრიდან First (პირველი), საქართველო იყოს Next (შემდეგი), ჩვენი მხრიდან იქნება Georgia First და America next. ამაზე შევჯერდით. ეს ნიშნავს მჭიდრო თანამშრომლობის გაგრძელებას. მე განსაკუთრებული ყურადღება გავამახვილე ქვეყნის ეკონომიკურ გაძლიერებაზე, რის გარეშეც ჩვენ ვერ შევძლებთ იმ როლის შესრულებას, რასაც თავად აშშ ხედავს ჩვენში".

რაც შეეხება თავისუფალი დემოკრატების ერთ-ერთ ლიდერს, შალვა შავგულიძეს, მან თქვა, რომ აშშ-ს ვიცე-პრეზიდენტთან ისაუბრა ხელისუფლების ხელში ჭარბი ძალაუფლების კონცენტრაციასა და არაფორმალური მმართველობის პრობლემაზე. როგორც მან თქვა, პენსმა მნიშვნელოვანი უწოდა აღნიშნულ ინფორმაციას.

ნაციონალური მოძრაობის პოლიტიკური საბჭოს თავმჯდომარის, ნიკა მელიას თქმით, შეხვედრა იმაზე პროდუქტიული აღმოჩნდა, ვიდრე მას წარმოედგინა. როგორც მელია ამბობს, მაიკ პენსის ვიზიტი არის დასტური იმისა, რომ აშშ ურყევად უჭერს მხარს საქართველოს ტერიტორიულ მთლიანობასა და დამოუკიდებლობას.

მაიკ პენსი საქართველოს ორდღიანი ვიზიტით 31 ივლისს ეწვია. ის საქართველოში ესტონეთიდან ჩამოვიდა, თბილისიდან კი მონტენეგროს ეწვევა.