საქართველოს გენერალური პროკურორი გიორგი გაბიტაშვილი გახდა. მას მხარი დაუჭირა პარლამენტის 80-მა დეპუტატმა.

გაბიტაშვილის კანდიდატურას კენჭი უყარეს დღეს, 18 ივლისს, პარლამენტის რიგგარეშე სესიაზე. იქამდე კი, გაბიტაშვილის კანდიდატურას პარლამენტის იურიდიულ საკითხთა სხდომაზე მხარი დაუჭირეს.

გენერალური პროკურორის თანამდებობაზე გაბიტაშვილის კანდიდატურა საპროკურორო საბჭოში 11 ივლისს, კენჭისყრის შედეგად შეირჩა. მას მხარი საბჭოს 11-მა წევრმა დაუჭირა.

გაიგე მეტი: საპროკურორო საბჭომ საქართველოს გენერალური პროკურორობის სამი კანდიდატი შეარჩია

გიორგი გაბიტაშვილი 2013 წლის 13 ივნისიდან გენერალური პროკურორის მოადგილე იყო.

მან პროკურატურაში კარიერა 2007 წელს დაიწყო სტაჟირების პროგრამით, რომლის დასრულების შემდეგ შიდა ქართლისა და მცხეთა-მთიანეთის საოლქო პროკურატურაში პროკურორის თანამდებობაზე დაინიშნა.

2009 წელს გაბიტაშვილი დააწინაურეს და შინაგან საქმეთა სამინისტროს ორგანოებში გამოძიების საპროცესო ხელმძღვანელობის განყოფილების უფროსად დანიშნეს, სადაც ის 2013 წლამდე საქმიანობდა.

2013 წლის 14 იანვრიდან გიორგი გაბიტაშვილმა პროფესიული საქმიანობა გააგრძელა საქართველოს ფინანსთა სამინისტროს საგამოძიებო სამსახურის დეპარტამენტის უფროსის თანამდებობაზე.