Apple Original Films-ისა და Warner Bros. Pictures-ის საერთო ფილმში F1 მთავარ როლს ბრედ პიტი შეასრულებს, მისი რეჟისორი კი Top Gun: Maverick-ის ავტორი, ჯოზეფ კოსინკსი იქნება. ფილმი დიდ ეკრანებზე 2025 წლის 25 ივნისს გამოვა.

ფოტო: FanBolt

ბრედ პიტი სონი ჰეიესის, ფორმულა 1-ის ყოფილი მრბოლელის როლს ასრულებს, რომელიც ჩქაროსნულ სპორტს უბრუნდება, რათა პარტნიორობა გაუწიოს გამოუცდელ თანაგუნდელს, ჯოშუა პირსს.

ფოტო: Apple Original Films

"სონი ჰეიესი საშინელ ავარიაში მოყვა, რის შემდეგაც კარიერაზე უარი თქვა, გაუჩინარდა და მცირე რბოლებში იღებდა მონაწილეობას. მისი მეგობარი, რომლის როლსაც ხავიერ ბარდემი ასრულებს, Formula 1-ის გუნდის მფლობელია. ნული ქულის მფლობელი გუნდი ბოლო ადგილოსანია, თუმცა ახალგაზრდა, ფენომენალური მრბოლელი, ჯოშუა პირსი ჰყავთ. მის გასაწვრთნელად და დასახმარებლად გუნდში დაბრუნებაზე ჩემს პერსონაჟსაც ითანხმებენ და მთავარი თავგადასავალიც სწორედ აქედან იწყება," — განაცხადა ბრედ პიტმა Sky Sports-თან ინტერვიუში.

ფილმში ბრედ პიტთან ერთად მონაწილეობას მიიღებენ ხავიერ ბარდემი, ტობიას მენზისი, სარა ნაილსი, კიმ ბოდნია და სამსონ კაიო. F1-ის პროდიუსერები კი ჯერი ბრუკჰაიმერი, ბრედ პიტი და ფორმულა 1-ის შვიდგზის მსოფლიოს ჩემპიონი, ლუის ჰამილტონი იქნებიან. ბრედ პიტის თქმით, ფილმი ფორმულა 1-ის რეალურ რბოლებზეა გადაღებული, მათ შორის, ბრიტანეთის გრანდ პრიზე.