დღეს, ბევრ ქართულ მობილურში, გამოტოვებული ზარები შევიდა — უცხო ნომრები პაპუა-ახალი გვინეიდან ან კარიბის აუზის ქვეყნებიდან რეკავდნენ. მათ შორის იყო ნომრები:

  • +675 7089 4035
  • +675 7089 4040
  • +675 7089 4025

...და კიდევ რამდენიმე.

ასეთ დროს უნდა იცოდეთ, რომ საქმე თაღლითურ სქემასთან გაქვთ და არ გადაურეკოთ ამ ნომრებს.

ეს თაღლითობა ახალი არ არის, ადრეც ყოფილა მსგავსი ზარები ქართულ ნომრებზე, თუმცა, როგორც ფეისბუქ-მომხმარებლების რეაქციებით შეგვიძლია ვივარაუდოთ, ამჯერად უფრო მასშტაბურ შემთხვევასთან გვაქვს საქმე.

როგორ ხდება თაღლითობა?

ამ სქემას "ვანგირი ზარებს" ეძახიან — სიტყვა "ვანგირი" იაპონურია და ნიშნავს "ერთი ზარი და დაკიდება"-ს. სავარაუდოდ, თაღლითობის მეთოდიც იაპონიიდან იღებს სათავეს.

ბოროტმოქმედები სპეციალურ მოწყობილობებს ან პროგრამებს იყენებენ, რათა ავტომატურად დარეკონ შემთხვევით შერჩეულ ათასობით ნომერზე. ამ დროს, მსხვერპლის ნომერთან შედის მხოლოდ ერთი ზარი და შემდეგ — მომენტალურად ითიშება.

ვანგირი ზარების მიზანია, ადამიანმა შესულ ნომერზე გადარეკოს. ბევრი არც აკვირდება ნომერს, ან, უბრალოდ აინტერესებთ, ვინ ურეკავდათ ეგზოტიკური ქვეყნიდან და პირდაპირ რეკავენ ხოლმე. საბოლოოდ, ნომერი ე.წ. "პრემიუმ ფასიანი" აღმოჩნდება, სადაც (ასევე თაღლითური) "უფასო პრიზების" ან ინტიმური სერვისების რეკლამა დაგხვდებათ.

ზარის მიზანია, რაც შეიძლება დიდხანს დაგტოვონ ხაზზე, ამიტომ, შესაძლოა რეკლამის ნაცვლად სულაც მუსიკა ან ხუმრობები მოგასმენინონ. რეალურად კი, ასეთ დროს, თქვენი ტელეფონის ანგარიშიდან მნიშვნელოვანი თანხა იხარჯება. შესაძლოა, განსაკუთრებული ტარიფის მქონე ნომრის ზედმეტი საფასური არ მოჭრან ქართულმა ოპერატორებმა, მაგრამ ამის გარეშეც, პაპუა-ახალ გვინეაში საერთაშორისო ზარი, იაფი ნამდვილად არ დაგიჯდებათ.

გავრცელებული მოსაზრების მიუხედავად, ასეთი სქემით ბოროტმოქმედი თქვენს ტელეფონში ნამდვილად ვერ შემოაღწევს, ვერც "ვირუსს შემოუშვებს" და ვერც ფოტოებს მოგპარავთ. თუმცა, ფინანსური ზარალი არანაკლებად საყურადღებოა.

გაუზიარეთ ეს ამბავი მეგობრებს, იყავით ფრთხილად და გახსოვდეთ:

  1. მოერიდეთ უცხოურ, გამოტოვებულ ნომრებზე დარეკვას;
  2. თუ მაინც წაგძლევთ სული — მომენტალურად გათიშეთ, როგორც კი დარწმუნდებით, რომ თაღლითობაა;
  3. თუ არ გათიშავთ და საუბარს გააბამთ — გაერთეთ, თქვენი ნებაა, მაგრამ პირადი ინფორმაცია არასოდეს გათქვათ (სახელი, მისამართი, საბანკო ბარათების ნომრები და ა.შ.);
  4. აუცილებლად შეატყობინეთ თქვენს მობილურ ოპერატორს ამის შესახებ.