პრინცი ლუი ხომ გახსოვთ? ბრიტანეთის სამეფო ოჯახის პატარა წევრი, რომელმაც რამდენიმე წლის წინ დიდი ბებიის, დედოფალი ელიზაბეთის, იუბილეზე თავისი სიცელქით ყველას ყურადღება მიიქცია და მსოფლიო მედიის მთავარ გვერდებზეც აღმოჩნდა. მას შემდეგ ორი წელი გავიდა, უელსის პრინცი ლუი უკვე 6 წლის გახლავთ, მაგრამ მაინც ვერაფრით ისვენებს!

15 ივნისს გაერთიანებულ სამეფოში მეფე ჩარლზის ოფიციალური იუბილე აღინიშნა. რასაკვირველია, ცერემონიაზე პრინცი უილიამი და პრინცესა ქეთრინიც გამოჩნდნენ შვილებთან ერთად. მათგან ყველაზე უმცროსმა ლუიმ კი სულ მალე გადაფარა ზეიმი თავისი ცეკვით. ვიდეოში, რომელმაც ინტერნეტი ვირუსულად მოიცვა, ჩანს, როგორ ენერგიულად ცეკვავს პატარა პრინცი მუსიკაზე; ამის შემხედვარე, დედამისი, პრინცესა ქეთრინი, იცინის, ლუის უფროსი და, პრინცესა შარლოტი კი, ძმას აშკარად ტუქსავს და მოუწოდებს, გაჩერდეს.

მკაცრი დის მითითებების მიუხედავად, ლუის მშვიდად გაჩერება მაინც გაუჭირდა: ჯერ დედასთან საუბრისას დაიწყო ფარდის ზონრით თამაში, მერე კი, როცა ცერემონია მისთვის ალბათ მეტისმეტად მოსაწყენი გახდა, ვერაფრით მოერია მთქნარებას!

ფოტო: BBC

სხვათა შორის, პრინცი ჩარლზის ოფიციალურ იუბილეზე პრინცესა ქეთრინი (ქეით მიდლტონი) პირველად გამოჩნდა საჯაროდ მას შემდეგ, რაც მარტში განაცხადა, რომ სიმსივნის დიაგნოზი დაუსვეს.

რაც შეეხება ლუის, 2018 წელს დაბადებული პრინცი უკვე ხალხის დიდი სიყვარულით სარგებლობს როგორც ბრიტანეთში, ასევე — მსოფლიოში. მისი საჯაროდ გამოჩენა ყოველთვის მხიარულებას იწვევს და, რეაქციებით თუ ვიმსჯელებთ, პატარა ლუის ეს ძალიანაც მოსწონს.

"ერთი ონავარი მაიმუნია — ტიპური ნაბოლარა", — განუცხადა ჟურნალ PEOPLE-ს სამეფო ოჯახთან დაახლოებულმა პირმა.

ლუის ონავრობის ამბავი კი, ცხადია, ყველაზე უკეთ მის მშობლებს მოეხსენებათ.

"მშვენიერი დრო გავატარეთ, განსაკუთრებით — ლუიმ", — აღნიშნეს პრინცმა უილიამმა და პრინცესა ქეთრინმა დედოფალი ელიზაბეთის იუბილეს შემდეგ.

ასევე იხილეთ: