რა მოხდა: საქართველოს ოპოზიციური პარტიებმა და პოლიტიკოსებმა, ჰელსინკის კომისიის თავმჯდომარეს და MEGOBARI აქტის ინიციატორს, სენატორ ჯო ვილსონს ღია წერილი გაუგზავნეს.

• მათ ამერიკის შეერთებული შტატების კონგრესს სთხოვეს, გამოყოს საჭირო ადამიანური და ფინანსური რესურსები, რომ საქართველოში 2024 წლის საპარლამენტო არჩევნებს დააკვირდნენ.

დეტალები: წერილის ავტორების თქმით, მიუხედავად იმისა, რომ საქართველოს მთავრობამ, რუსული კანონის ხელახლა ინიციირებით, საფრთხის ქვეშ დააყენა საქართველოს ევროატლანტიკური კურსი, ქართველი ხალხი მტკიცედ იცავს ამ კურსს.

• "ქართველები გამოვიდნენ თბილისის და სხვა დიდი ქალაქების ქუჩებში, როდესაც ხელისუფლებამ ოპოზიციის ლიდერები, სამოქალაქო საზოგადოების აქტივისტები, მედიის წარმომადგენლები და მშვიდობიანი მომიტინგეები უპრეცედენტო ძალადობით დაარბია.
• მუდმივად გაუარესებულ ვითარებაში, ათეულობით ადამიანი სასტიკად სცემეს და უკანონოდ დააკავეს, ასევე, ოპოზიციური პარტიის ოფისები დაარბიეს ხელისუფლების მიერ დაფინანსებულმა ძალადობრივმა ჯგუფებმა. საქართველოს მშვიდობიანი მოქალაქეების მიმართ დაშინებისა და ტერორის ყოვლისმომცველი კამპანია მხოლოდ მწვავდება", — ვკითხულობთ წერილში.

ოპოზიცია წერს, რომ მთავრობა საქართველოში ავტორიტარიზმისკენ მიიწევს და საზღვარგარეთაც ავტორიტარებს დაექვემდებარა:

• "მათ შორის, უკანასკნელი შეთანხმებით, შავ ზღვაზე ანაკლიის ღრმაწყლოვანი პორტის და სხვა საკვანძო ინფრასტრუქტურული პროექტების ჩინეთის მთავრობასთან დაკავშირებული კომპანიებისთვის გადაცემით, მას შემდეგ, რაც არსებითად განდევნა ამერიკელი ინვესტორები ქვეყნიდან".

ამ თემაზე: TI: ხელისუფლება ანაკლიის პორტს კორუფციული სკანდალებით ცნობილ ჩინურ სახელმწიფო კომპანიას ააშენებინებს

წერილის ავტორები ჯო ვილსონს მადლობას უხდიან MEGOBARI აქტის ინიციირების და თავდაცვისა და უსაფრთხოების სფეროში თანამშრომლობის გაღრმავების ინიციატივისთვის, რომელიც, მათი შეფასებით, მორგებულია საქართველოს საჭიროებებზე.

• "უახლოეს თვეებში, როდესაც მივუახლოვდებით ჩვენი ერის ისტორიაში კრიტიკულ წერტილს, მივესალმებით, ჩვენი პარტნიორების მხარდაჭერას, მათ შორის, პირად ვიზიტებს.
• ჩვენ გვჯერა, რომ კონგრესის დელეგაციის ვიზიტები საქართველოში დიდ გავლენას მოახდენს საქართველოს თავისუფლებისმოყვარე ხალხის მხარდაჭერაზე და იქნება ძლიერი სიგნალი საქართველოს მთავრობისთვის, რომ ხალხის ხმის ძალით გაჩუმება შეუძლებელია", — ვკითხულობთ წერილში.

წერილს ხელს აწერენ:

• მოქალაქეები — ალეკო ელისაშვილი, საპარლამენტო პოლიტიკური ჯგუფის თავმჯდომარე;
• ევროოპტიმისტები — რომან გოცირიძე, საპარლამენტო პოლიტიკური ჯგუფის თავმჯდომარე;
• ეროვნული და დემოკრატიული სახელმწიფოსთვის — ნიკა მაჭუტაძე, საპარლამენტო პოლიტიკური ჯგუფის თავმჯდომარე;
• საქართველოსთვის — ბექა ლილუაშვილი, საპარლამენტო პოლიტიკური ჯგუფის თავმჯდომარე;
• თავისუფლება — ნატო ჩხეიძე, საპარლამენტო პოლიტიკური ჯგუფის თავმჯდომარე;
• გირჩი — იაგო ხვიჩია, საპარლამენტო პოლიტიკური ჯგუფის თავმჯდომარე;
• ლელო- პარტნიორობა საქართველოსთვის დავით უსუფაშვილი — საპარლამენტო პოლიტიკური ჯგუფის თავმჯდომარე;
• რეფორმების ჯგუფი — თეონა აქუბარდია, საპარლამენტო პოლიტიკური ჯგუფის თავმჯდომარე;
• ერთიანი ნაციონალური მოძრაობა — თინა ბოკუჩავა, საპარლამენტო ფრაქციის თავმჯდომარე;

• პარტია ახალი — ნიკა გვარამია, ნიკა მელია, თანათავმჯდომარეები;

• პარტია დროა — ელენე ხოშტარია, თავმჯდომარე;

• პარტია გირჩი — მეტი თავისუფლება — ზურაბ გირჩი ჯაფარიძე, თავმჯდომარე;
• რესპუბლიკური პარტია — ხათუნა სამნიძე, თავმჯდომარე;
• სტრატეგია აღმაშენებელი — გიორგი ვაშაძე, თავმჯდომარე.

დამოუკიდებელი დეპუტატები

• არმაზ ახვლედიანი;
• დავით ბაქრაძე;
• თამარ ჩარკვიანი;
• თამარ კორძაია;
• სალომე სამადაშვილი;
• შალვა შავგულიძე.