მოკლედ: ქართულმა ოცნებამ ჰომოფობიური კანონი დაარეგისტრირა.

ამის შესახებ დღეს, 4 ივნისს, პარლამენტის თავმჯდომარემ, შალვა პაპუაშვილმა განაცხადა.

დეტალები: პაპუაშვილის თქმით, საკანონმდებლო პაკეტი შედგება 19 კანონისგან, საიდანაც ერთი არის ძირითადი, 18 კი გამომდინარე კანონი.

  • კანონპროექტის მიხედვით, ერთნაირსქესიანთა ქორწინება დაუშვებელია, ასევე, მათ არ ექნებათ ბავშვის აყვანის უფლება — რაც, მოქმედი კანონმდებლობითაც ასეა.
  • საქართველოში აიკრძალება სქესის შეცვლის მიზნით ქირურგიული ოპერაციები.
  • პირადობის მოწმობაში სქესის შეცვლა შეუძლებელი იქნება.
  • ასევე, კანონის თანახმად, საგანმანათლებლო დაწესებულებაში "ლგბტ პროპაგანდის" წარმოება დაუშვებელი იქნება.

კანონი შეზღუდავს ინფორმაციის გავრცელებას მაუწყებლების ეთერშიც, კონკრეტულად, ისეთი ინფორმაციის, რომელიც მიმართულია ადამიანის საკუთარი სქესისგან განსხვავებული სქესის მიკუთვნების, ერთი და იმავე სქესის წარმომადგენლებს შორის ურთიერთობის ან ინცესტის "პოპულარიზაციისკენ".

"დავაზუსტებ, ეს ეხება მაუწყებლებსა და კინოჩვენებას. არ ეხება სხვა მხრივ კულტურულ ღონისძიებებს. ამ შემთხვევაშიც მაუწყებლებს ეხება იმ ფარგლებში მხოლოდ, რომ პირობითად თუ ტელევიზიით გადის რაიმე ფილმი და არის ინტიმური სცენა ამ შინაარსის, ეს სცენა უნდა იყოს შეზღუდული. ეს შეზღუდვა ეხება კინოთეატრებსაც", — თქვა პაპუაშვილმა.

  • აიკრძალება ლგბტ თემის საჯარო შეკრებები და მანიფესტაციებიც, შალვა პაპუაშვილის მიერ წარდგენილი კანონპროექტი ამას "ერთი და იმავე სქესის წარმომადგენლებს შორის ურთიერთობის, ან ინცესტის პოპულარიზაციად" აფასებს.
  • მერვე საკითხი ეხება შრომით ურთიერთობებში, როგორც კერძო, ისე საჯარო დაწესებულებებში, ბათილი იქნება შრომითი ურთიერთობის ფარგლებში დაკისრებული ისეთი ვალდებულება, რომელიც მიმართულია ბიოლოგიური სქესის უგულვებელყოფისკენ.

"ეს არის ის რვა საკითხი, რომელიც მოწესრიგებული იქნება 19 კანონის მეშვეობით. გარდა ამისა, თავად ძირითად კანონში, ისევე როგორც შრომის კოდექსში 17 მაისი დაწესდება ოჯახის სიწმინდისა და მშობლების პატივისცემის დღედ, როგორც ეს 10 წელია, აღინიშნება და გამოცხადდება უქმე დღედ", — თქვა პარლამენტის თავმჯდომარემ.