რუსეთის ფედერაციის პრემიერ-მინისტრი, დმიტრი მედვედევი ფეისბუკზე ირონიული პოსტით გამოეხმაურა მიხეილ სააკაშვილისთვის უკრაინის მოქალაქეობის ჩამორთმევის ფაქტს.

"სააკაშვილის გასაოცარი ბედი: საქართველოს მოქალაქე, საქართველოს პრეზიდენტი, პირი, რომელსაც საქართველოს მოქალაქეობა ჩამოართვეს. უკრაინის მოქალაქე, პრეზიდენტის მეგობარი, ოდესის ოლქის გუბერნატორი, პირი, რომელსაც უკრაინის მოქალაქეობა ჩამოართვეს. უკრაინის ხელისუფლების თანამიმდევრულობა გასაოცარია - უკრაინის მოქალაქეობის მინიჭება საქართველოს ყოფილი პრეზიდენტისთვის, მისი გუბერნატორად დანიშვნა, შემდეგ მისთვის მოქალაქეობის შეწყვეტა და საქართველოში ექსტრადირებაზე დათანხმება. ეს ყველაფერი, უდავო მტკიცებულებაა ამ ორი ხალხის უმაღლესი მორალური ღირებულებების, რომლებმაც გაითამაშეს ეს ფანტასტიური ტრაგიკომედია. შოუ უნდა გაგრძელდეს".

ინფორმაცია მიხეილ სააკაშვილისთვის უკრაინის მოქალაქეობის ჩამორთმევის შესახებ 26 ივლისს გავრცელდა. აღნიშნულს წინ უძღოდა უკრაინის პრეზიდენტის, პეტრო პოროშენკოს ვიზიტი საქართველოში. უკრაინის ხელისუფლება აცხადებს, რომ სააკაშვილისთვის მოქალაქეობის შეწყვეტის მიზეზი გახდა მის მიერ მოქალაქეობის მიღებისას შევსებულ დოკუმენტებში ჩაწერილი ტყუილი. კერძოდ, მათი თქმით, სააკაშვილმა მიუთითა, რომ მის მიმართ სისხლის სამართლებრივი დევნა არცერთ ქვეყანაში არ მიმდინარეობდა, თუმცა, საქართველოს მასზე ძებნა ჰქონდა გამოცხადებული.

ამჟამად აშშ-ში მყოფი საქართველოს მესამე პრეზიდენტი სამართლებრივ ბრძოლასა და უკრაინაში დაბრუნებას გეგმავს:

"მე ერთი მოქალაქეობა მაქვს - უკრაინული და ისინი ვერ შეძლებენ ამის წართმევას. ხელისუფლება ცდილობს, მაიძულოს დევნილის სტატუსი მივიღო ან მოვითხოვო, ეს არ მოხდება".