საქართველოს საპარლამენტო უმრავლესობამ არ გაიზიარა პრეზიდენტის მოტივირებული შენიშვნები და მის მიერ ორ კანონთან დაკავშირებით გამოყენებული ვეტოები უპრობლემოდ დაძლია.

"თვითმმართველობის კოდექსი" და "საარჩევნო კოდექსი" ის კანონპროექტებია, რასთან დაკავშირებითაც პრეზიდენტს შენიშვნები ჰქონდა. მისი მოსაზრებები პარლამენტს პრეზიდენტის საპარლამენტო მდივანმა ანა დოლიძემ წარუდგინა.

საქართველოს პრეზიდენტს მიაჩნია, რომ წარმოდგენილი კანონპროექტები ეწინააღმდეგება საქართველოს კონსტიტუციის როგორც ძირითად, ისე ადგილობრივი თვითმმართველობის ფუძემდებლურ პრინციპებს, საქართველოს მოქალაქეთა ინტერესებს განახორციელონ ადგილობრივი თვითმმართველობა დამოუკიდებლად.

ცვლილების თანახმად, შვიდ თვითმმართველ ქალაქს - თელავს, ოზურგეთს, ზუგდიდს, გორს, ამბროლაურს, მცხეთასა და ახალციხეს ჩამოერთმევა თვითმმართველი ქალაქის სტატუსი და ისინი მიუერთდება შესაბამის მუნიციპალიტეტებს. შედეგად, ქვეყანაში, ნაცვლად 12 თვითმმართველი ქალაქისა, დარჩება 5 თვითმმართველი ქალაქი.

პრეზიდენტის საპარლამენტო მდივნის გაცხადებით, 2017 წლის ოქტომბერში იგეგმება ადგილობრივი თვითმმართველობის არჩევნების ჩატარება. უკვე დაწყებულია რიგი საორგანიზაციო სამუშაოები. ქვეყნის მასშტაბით ადგილობრივი თვითმმართველობის არჩევნებისათვის მზადების პირობებში თვითმმართველობის სფეროში მნიშვნელოვანი ცვლილებების გატარება და განსაკუთრებით კი თვითმმართველი ერთეულების გაუქმება, დაარღვევს საარჩევნო გარემოს სტაბილურობას და არასასურველ შედეგებს გამოიწვევს.

რაც შეეხება "საარჩევნო კოდექსის“ ცვლილებებს, ანა დოლიძის განცხადებით, საქართველოს ორგანული კანონის პროექტის თანახმად, იცვლება პარტიების მიერ ცესკოს წევრების დანიშვნისა და მათთვის უფლებამოსილების შეწყვეტის წესი.

ცესკოს დაკომპლექტების შემოთავაზებული რეგულაცია, ანა დოლიძის აზრით, ვერ უზრუნველყოფს საარჩევნო ადმინისტრაციისადმი ნდობას და არჩევნების მართვის პროცესში პოლიტიკურ პლურალიზმს. საარჩევნო ადმინისტრაციის დაკომპლექტება არსებითი საკითხია, რადგან მნიშვნელოვნად განსაზღვრავს საარჩევნო პროცესის სამართლიანად წარმართვისადმი საზოგადოების ნდობასა და არჩევნების შედეგების ლეგიტიმურობის ხარისხს, ასევე გავლენას ახდენს დემოკრატიული ინსტიტუტების ფორმირებაზე.