რა ხდება: შს მინისტრმა, ვახტანგ გომელაურმა თქვა, რომ პარლამენტის ბლოკირების შემთხვევაში, "ყოველგვარი გამონაკლისის გარეშე" აამოქმედებენ სისხლის სამართლის კოდექსის 222-ე მუხლის მეორე ნაწილს, რომელიც 4-წლიან პატიმრობას ითვალისწინებს.

  • ამის შესახებ მან შსს-ში გამართულ ბრიფინგზე განაცხადა.

დეტალები: მინისტრის თქმით, მათი ოპერატიული ინფორმაციისა და ასევე, პოლიტიკოსების საჯარო განცხადებებზე დაყრდნობით, მომდევნო 2 დღის განმავლობაში, დაგეგმილია, რუსული კანონის წინააღმდეგ შეკრებამ მიიღოს "ძალადობრივი და კანონსაწინააღმდეგო ხასიათი".

  • კონკრეტულად, გომელაური ამბობს, რომ აქციის ორგანიზატორები პარლამენტის ბლოკირებას გეგმავენ.

შს მინისტრის განცხადებით, გასულ წლებში პოლიცია ლოიალური იყო და ამ მუხლს ხშირად არ იყენებდა, თუმცა ახლა სისხლის სამართლის კოდექსით დააკავებენ ყველას, "დანაშაულის ჩადენის შემთხვევაში".

  • "გამოვთქვამთ იმედს, რომ რაც შეიძლება ნაკლები ადამიანი ჩაერთვება პოლიტიკოსებისა და სხვა შიდა და გარე სუბიექტების მიერ დაგეგმილ პროვოკაციაში და შესაბამისად, თავიდან აიცილებს მკაცრ სასჯელს, რომელიც საზოგადოებრივი უშიშროებისა და წესრიგის წინააღმდეგ ჩადენილი ზემოაღნიშნული დანაშაულისთვის არის გათვალისწინებული", — თქვა გომელაურმა.

კონტექსტი: დღეს, 12 მაისს, 22 საათზე პარლამენტის შენობასთან დაიწყება აქცია, სახელწოდებით გავათენოთ საქართველოსთვის, რომელიც მთელი ღამის განმავლობაში გასტანს.

  • პარლამენტში რუსული კანონის მესამედ მოსმენა ხვალ, 13 მაისს, საკომიტეტო სხდომაზე იგეგმება.
  • სხდომა დილის 9 საათზეა დანიშნული.
  • "ჩვენ უნდა ჩავხედოთ ამ 83-ს [ქართული ოცნების დეპუტატს] თვალებში. მათ არ უნდა მიიღონ რუსული კანონი, ამიტომ ჩვენ ბევრნი უნდა ვიყოთ", — თქვა გუშინ მწერალმა ლაშა ბუღაძემ, ევროპის მოედანზე გამართულ აქციაზე.