მოკლედ: ორშაბათს, 13 მაისს, რუსული კანონის იურიდიულ საკითხთა კომიტეტში განხილვის პარალელურად, საქართველოს პარლამენტში ყვითელი დონე იმოქმედებს და ვიზიტორებს შეეზღუდებათ პარლამენტის სასახლეში შესვლა. ამის შესახებ საკანონმდებლო ორგანომ განცხადება გაავრცელა.

  • როდემდე იმოქმედებს პარლამენტში ყვითელი დონე, არ დაუკონკრეტებიათ.

დეტალები: პარლამენტის თანახმად,

  • დაგეგმილ საპარლამენტო ღონისძიებებზე, მათ შორის, კომიტეტის და პლენარულ სხდომებზე, დაიშვებიან მხოლოდ შესაბამისი სტრუქტურული ერთეულების მიერ მოწვეული პირები.
  • ასევე, შენობაში დაიშვებიან ტელემაუწყებლების/ტელემედია საშუალებების აკრედიტებული არაუმეტეს ორი ჯგუფი თითო მაუწყებლიდან, საპარლამენტო ღონისძიებების დასრულებამდე.
  • ეს არ არის პირველი შემთხვევა, როდესაც რუსული კანონის საპარლამენტო განხილვებისას პარლამენტის თავმჯდომარის გადაწყვეტილებით, შენობაში ონლაინ მედიის წარმომადგენლებს შესვლისა და მუშაობის შესაძლებლობა არ ეძლევათ.
  • "აღნიშნული ღონისძიების მიზანია საქართველოს პარლამენტის სასახლეში სამუშაო და უსაფრთხო გარემოს უზრუნველყოფა", — წერია განცხადებაში.

კონტექსტი: ორშაბათს, 13 მაისს, 09:00 საათზე, საქართველოს პარლამენტის იურიდიულ საკითხთა კომიტეტი, რუსულ კანონს მესამე მოსმენით განიხილავს, ხოლო სამშაბათს, 14 მაისს, კანონი პლენარულ სხდომაზე განიხილება.

  • დღეს, 12 მაისს, პარლამენტთან რუსული კანონის საპროტესტო აქცია დაიწყება.
  • აქციის ორგანიზატორების თქმით, აპირებენ საკანონმდებლო ორგანოსთან ღამითაც დარჩნენ.
  • "ქვეყნის სიყვარულში ჩვენი დაუღალავი ერთობით — გავათენოთ ღამე ერთად და დილით, არ მივცეთ საშუალება ოცნების დეპუტატებს, აუღელვებლად შევიდნენ პარლამენტის შენობაში და გააგრძელონ ხალხის ნების, ევროკავშირისა და კონსტიტუციის საწინააღმდეგო მოქმედება", — ნათქვამია განცხადებაში.