მოკლედ: შინაგან საქმეთა სამინისტრო განცხადებას ავრცელებს და ამტკიცებს, რომ თითქოს, 8-9 მაისის აქციებისას დაკავებულ ექვს პირთაგან ერთ-ერთმა, ოპოზიციონერი პოლიტიკოსებისგან მითითებული დავალების შესრულების სანაცვლოდ, 1 200 ლარი აიღო.

  • პირი, რომელიც შსს-ს მიერ გავრცელებულ ვიდეოში საუბრობს, არაიდენტიფიცირებადია.
  • "პერსონალური მონაცემების დაცვის მიზნით, შინაგან საქმეთა სამინისტრო არ დაასახელებს იმ პირის სახელსა და გვარს, რომლის ჩვენებასაც ახლა გავაცნობთ საზოგადოებას", — აცხადებს უწყება.
  • ვიდეოში ჩანს, რომ ჩანაწერში წარმოდგენილი არაიდენტიფიცირებადი პირი ზედმიწევნით საუბრობს ვერსიაზე, რომელიც თანხვედრაშია ხელისუფლების ამოცანასთან, რუსული კანონის წინააღმდეგ ფართომასშტაბიანი უწყვეტი პროტესტი "რადიკალური ოპოზიციის" მართულად წარმოაჩინოს.

განცხადებიდან: "დაკავებულთა შორის, ერთ-ერთი პირი, სამართალდამცველებთან მიცემულ ჩვენებაში აცხადებს, რომ ის 16 აპრილს, იმყოფებოდა საპროტესტო აქციაზე, რა დროსაც მან გაიგო პოლიტიკური ლიდერების, კერძოდ ნიკანორ მელიას, ალეკო ელისაშვილის, ნიკა გვარამიას, გიორგი ვაშაძის, ზურაბ ჯაფარიძისა და კიდევ ერთი, მისთვის უცნობი მამაკაცის საუბარი, იმის შესახებ, რომ ისინი ახალგაზრდებს გარკვეული დავალებების შესრულების სანაცვლოდ გადაუხდიდნენ გარკვეულ თანხას.

  • დაკავებული აცხადებს, რომ ის, თავისი ნებით მივიდა აღნიშნულ პოლიტიკურ ლიდერებთან ერთად მყოფ მამაკაცთან და გამოთქვა მზაობა, თანხის მიღების სანაცვლოდ, შეესრულებინა მათ მიერ მითითებული დავალება.
  • ბრალდებულის თქმით, მან დავალების მიმცემი პირებისგან მაშინვე მიიღო თანხა, 1200 ლარი. ბრალდებული ასევე აცხადებს, რომ მთავარი დავალება იყო პოლიციელებისთვის შეურაცხყოფის მიყენება, მათი გაღიზიანება, გამოწვევა, სამართალდამცველების ყურადღების მიქცევა და ასევე, სხვადასხვა საპოლიციო ინფრასტრუქტურის დაზიანება.
  • დაკავებული აღიარებს, რომ მან მიღებული დავალება შეასრულა, რაზეც მეტყველებს კადრებიც და მან დააზიანა საპატრულო პოლიციის დეპარტამენტის ბალანსზე არსებული ავტომობილი. მისი განმარტებით, ავტომობილის დაზიანების შემდეგ, მან ძალადობრივი ქმედების ამსახველი ვიდეომასალა ატვირთა, ერთ-ერთ სოციალურ ქსელში, კონკრეტულად ინსტაგრამზე. აღსანიშნავია, რომ ესეც დავალების ნაწილს წარმოადგენდა."

ასევე წაიკითხეთ: 15 აპრილიდან 9 მაისის ჩათვლით, 134 დაკავებული პირის შესახებ შემოვიდა შეტყობინება — საია