ცოტა ხნის წინ ნიუ-იორკის მეტროპოლიტენის მუზეუმში Met Gala 2024 ჩატარდა. ღონისძიებას არაერთი ცნობილი ადამიანი დაესწრო, მათ შორის, კორეული ბოიბენდის, Stray Kids-ის, წევრებიც. ბოლო დღეებია, Stray Kids-ის ფანები ინტერნეტში ავრცელებენ ვიდეოებს, რომლებშიც Met Gala-ს ფოტოგრაფები ბენდის წევრებს უხეშად მიმართავენ, რასაც დიდი პროტესტი მოჰყვა.

@kpopkittynews Paparazzi, photographers or whatever behaviors towards straykids at met gala 😕 #metgala #straykids #paparazzi #fyp #straykidsstay #kpop ♬ original sound - Kpopkittynews

ტიკტოკზე გავრცელებულ ერთ-ერთ ვიდეოში Met Gala-ს ფოტოგრაფების უხეშ ფრაზებს ვისმენთ, რის პარალელურადაც, ისინი Stray Kids-ის წევრებს წითელ ხალიჩაზე ფოტოებს უღებენ. "ცხოვრებაში ამდენი უემოციო სახე არსად მინახავს", — ამბობს ერთ-ერთი ფოტოგრაფი. დანარჩენი ფოტოგრაფები ჯგუფის წევრებს ინგლისურად მიმართავენ და უყვირიან, რომ უფრო ახლოს დადგნენ, შემდეგ კი დასცინიან, რადგან Stray Kids-ის წევრები იმავე პოზიციაში დგანან.

ფოტოგრაფები და პრესის წარმომადგენლები იმ ფაქტმაც გააღიზიანა, რომ ჯგუფის წევრებმა ქურთუკები გაიხადეს და მათთვის ფოტოების გადაღება ხელახლა მოუწიათ. "ისევ თავიდან უნდა გადავიღოთ, იქნებ ამჯერად უკეთ გამოგივიდეთ. ახლა მეტი ემოცია გვაჩვენეთ", — ამ ფრაზებით მიმართავენ Met Gala-ს ფოტოგრაფები Stray Kids-ის წევრებს.

ფოტოგრაფების დამოკიდებულებას Stray Kids-ის ფანების მხრიდან დიდი პროტესტი მოჰყვა. "Met Gala-ს პრესის დამოკიდებულება დამამცირებელი, უხეში და რასისტულიც კი არის! Stray Kids მეტს იმსახურებს", — წერს ტვიტერის ერთ-ერთი მომხმარებელი.

@dancekae #straykids #metgala #straykidsmetgala ♬ original sound - Kaeli Dance

"ყველა ცნობილ ადამიანს ასე ესაუბრებით, თუ მხოლოდ მათ, ვინც თქვენი აზრით, მხოლოდ კორეული იცის?", — ამბობს ტიკტოკერი Kaeli ვიდეოში. ტიკტოკერი "უემოციო სახეების" შესახებ ფოტოგრაფების მიერ ნათქვამ ფრაზასაც გამოეხმაურა. "ასე ესაუბრებით ცნობილ ადამიანებს, რომლებიც თქვენს ფოტოებში არ იღიმიან, თუ მხოლოდ Stray Kids-ის წევრებს?", — დასძინა ტიკტოკერმა და ფოტოგრაფები რასიზმშიც დაადანაშაულა.

აღსანიშნავია, რომ სამხრეთ კორეული ბოიბენდი Stray Kids 2017 წელს შეიქმნა და მსმენელის აღიარება მალევე მოიპოვა. დღეს Stray Kids-ს მსოფლიოში მილიონობით ფანი ჰყავს და არაერთი მუსიკალური ჯილდო აქვს მოპოვებული.