მოკლედ: 11 მაისს, ევროპის დღეს, რუსული კანონის საწინააღმდეგო მანიფესტაცია დაანონსდა.

  • "მინდა დაიმახსოვროთ ეს თარიღი — 11 მაისი. ყველამ ერთად მოვაწყოთ ძალიან დიდი მანიფესტაცია. დიდი, მშვიდობიანი, ძლიერი, თავდაჯერებული მანიფესტაცია. ჩაინიშნეთ ეს თარიღი. ყველამ ავიღოთ ეს დავალება, ის ადამიანები, ვინც ჯერ აქ [აქციაზე] არ ყოფილან, მოვიყვანოთ", — განაცხადა ლევან ცუცქირიძემ, 2 მაისს, გმირთა მოედანზე გამართული საპროტესტო აქციის ერთ-ერთმა ორგანიზატორმა.

ევროპის დღე: საქართველო, 2024 წელს, ევროპის დღეს, ევროკავშირის წევრობის კანდიდატის სტატუსით პირველად აღნიშნავს. ევროპის დღე ყოველწლიურად 9 მაისს აღინიშნება, თუმცა, ამ თარიღთან დაკავშირებული სახალხო ზეიმი, თბილისში, ექსპო ჯორჯიაში, შაბათს, 11 მაისს გაიმართება.

რა ხდებოდა 2 მაისს, გმირთა მოედანზე: რუსული კანონის მოწინააღმდეგეები გმირთა მოედნის პიკეტირებისთვის 18:00 საათზე შეიკრიბნენ.

პარალელურად, რუსული კანონის საპროტესტო აქცია მიმდინარეობდა საქართველოს პარლამენტთან.

  • თავდაპირველად, გმირთა მოედანზე, პოლიციამ დემონსტრანტებს გზის გადაკეტვის საშუალება არ მისცა, მიზეზად "არასაკმარისი ხალხის რაოდენობა" დაასახელა.

გაიგე მეტი: გზის გადაკეტვა შეკრების თავისუფლების ფორმაა — საია

  • დემონსტრანტების რაოდენობა მალევე გაიზარდა და მათ შეაჩერეს სატრანსპორტო მოძრაობა. ისინი ქუჩაზე სხდებოდნენ, რომ ავტომობილების გადაადგილება შეეფერხებინათ.
დემონსტრანტები გმირთა მოედანს კეტავენ — 2 მაისი, 2024 წელი

დემონსტრანტები გმირთა მოედანს კეტავენ — 2 მაისი, 2024 წელი

ფოტო: მარიამ მერლანი/ On.ge

  • გმირთა მოედნის გადაკეტვის შემდეგ, ვითარება დაიძაბა. პოლიციამ ძალისმიერი მეთოდით სცადა აქციის მონაწილეების გაყვანა გზის სავალი ნაწილიდან.
  • პოლიციამ დაიწყო დაკავებები.

მსგავსი: პოლიციამ გმირთა მოედანზე, რამდენიმე წუთის წინ, სამი ადამიანი დააკავა

  • პოლიციის წინააღმდეგობის მიუხედავად, პროტესტმა სატრანსპორტო მოძრაობის პარალიზება გამოიწვია. დემონსტრანტებს შეუერთდნენ პარლამენტის წინ მყოფი აქციის მონაწილეებიც.
  • 3 მაისს, დაახლოებით ღამის პირველ საათზე, ცირკთან აქციის მონაწილეებს, უცნობი პირები, ფიზიკურად გაუსწორდნენ. დაშავდა რამდენიმე ადამიანი.
  • თვითმხილველები და დაზარალებულები ამბობდნენ, რომ თავდაპირველად, თავდამსხმელები მანქანით დაეჯახნენ ველოსიპედზე მჯდომ ადამიანს, შემდეგ კი აქციის სხვა მონაწილეებსაც სცემეს.

ასევე, ნახეთ: ცირკთან აქციის მონაწილეებს, უცნობი პირები, ფიზიკურად გაუსწორდნენ