ფოტოებში: ხალხი 9 აპრილის თავისუფლების მარშიდან

მოკლედ, ამ ამბის შესახებ: დღეს, 2024 წლის 9 აპრილს, თბილისში, რუსული კანონის წინააღმდეგ თავისუფლების მარში გაიმართა.

ქუჩაში გასული მოქალაქეები სკანდირებდნენ: კი ევროპას, არა — რუსულ კანონს.
მარში დაიწყო რესპუბლიკის მოედნიდან 18:00-ზე და გაგრძელდა საქართველოს პარლამენტის შენობის წინ.
აქციის ორგანიზატორებმა თქვეს, რომ პროტესტი გაგრძელდება 15 აპრილს.
ორშაბათს, 15 აპრილს, პარლამენტის იურიდიულ კომიტეტში რუსული კანონის პირველი მოსმენაა ჩანიშნული. შესაბამისად, მომდევნო კვირის დასაწყისში დაგეგმილი პროტესტი სწორედ ამის წინააღმდეგ მიემართება.
"ეს არის რამდენიმე ეტაპიანი ბრძოლა. კიდევ იქნება ბევრი ეტაპი და კიდევ ბევრჯერ მოგვიწევს შეკრება. ჩვენ ამისთვის მზად ვართ, ამისთვის ვიგეგმებით, ამ ბრძოლას აუცილებლად მოვიგებთ!", — თქვეს მათ.

რატომ არის მნიშვნელოვანი: დღევანდელი თავისუფლების მარშით, ისევე, როგორც გუშინდელი, 8 აპრილის პროტესტით, მოქალაქეები რეაგირებენ ხელისუფლების მორიგ მცდელობაზე, მიიღოს რუსული კანონი და "უცხოური ძალის ინტერესების გამტარებელ ორგანიზაციად" გამოაცხადონ დამოუკიდებელი მედიასაშუალებები და არასამთავრობო ორგანიზაციები.

ამასთან, ამგვარი ანტიდასავლური კანონპროექტის ინიციირებითა და ხელისუფლების მაღალჩინოსნების ღიად ანტიდასავლური განცხადებებით, ქართული ოცნების რიტორიკა მტრად განსაზღვრავს ქვეყნის დასავლელ სტრატეგიულ პარტნიორებს და არა რუსეთს, რომელსაც ოკუპირებული აქვს საქართველოს ტერიტორიების 20%, აგრძელებს შეუჩერებელ "ბორდერიზაციას" და ღიად ავლენს უკვე ოკუპირებული ტერიტორიების ანექსიის მცდელობებს.

**თავისუფლების მარში. თბილისი, 2024 წლის 9 აპრილი**

ფოტო: მარიამ მერლანი / On.ge

რუსული კანონის ქრონოლოგია:

2024 წლის 3 აპრილი

ოცნებამ განაცხადა, რომ ისევ აპირებს იმავე რუსული კანონის კანონის მიღებას, რამაც მასშტაბური სახალხო წინააღმდეგობა გამოიწვია გასული წლის მარტში.

8 აპრილი

პარლამენტის ბიუროს სხდომაზე განხილვის შემდეგ, რუსული კანონი დარეგისტრირდა.
პარლამენტში თქვეს, რომ კანონის განხილვას პარლამენტის იურიდიული კომიტეტი 15 აპრილს დაიწყებს.
ამას წინ უძღოდა საპროტესტო აქცია პარლამენტის შენობის უკან.
შესაბამისი ნებართვის მიუხედავად, პარლამენტში არ შეუშვეს დამოუკიდებელი მედიის ნაწილი.
პრეზიდენტის საპარლამენტო წარმომადგენელმა განაცხადა, რომ სალომე ზურაბიშვილი ვეტოს დაადებს კანონს.
გავრცელდა 400-ზე მეტი ორგანიზაციის განცხადება, მიმართვით — კი ევროპას, არა რუსულ კანონს!
დამოუკიდებელმა მედიასაშუალებებმა ერთობლივად განვაცხადეთ, რომ ქართულ ოცნებას არ მივცემთ რუსული კანონის მიღების საშუალებას.

9 აპრილი

თბილისში თავისუფლების მარში გაიმართა.

წაიკითხე: რატომ არის ქართული ოცნების კანონი რუსული — მოკლედ და მარტივად

ბოლო ამბები:

გირჩევთ

ფოტოებში: ხალხი 9 აპრილის თავისუფლების მარშიდან

რუსული კანონის ქრონოლოგია:

კომენტარები

კვირის ტოპ-5

გირჩევთ

ახლა კითხულობენ

საქართველომ რუსეთს ნარკოდანაშაულის ბრალდებით დაკავებული ორი პირი გადასცა