ტელეკომპანია რუსთავი 2-ის განცხადებით, თბილისის სააპელაციო სასამართლოს მოსამართლეთა კოლეგია, რომელმაც რუსთავი 2-ის საქმე განიხილა, არაუფლებამოსილია განიხილოს სამოქალაქო დავა:

"იუსტიციის უმაღლესი საბჭოდან რუსთავი 2-ის წერილის პასუხად, დღეს მიღებული დოკუმენტებით ირკვევა, რომ მოსამართლეთა კოლეგიის წევრმა შორენა ყაველაშვილმა 2005 წლის 18 ივნისს მოსამართლეთა საკვალიფიკაციო გამოცდა ჩააბარა სისხლის სამართლის სპეციალიზაციით, კანონის თანახმად კი, ყავლაშვილს არ ჰქონდა უფლება, ყოფილიყო იმ კოლეგიის შემადგენლობაში, რომელიც რუსთავი 2-ის სამოქალაქო დავას იხილავდა".

ტელეკომპანიის მიერ გავრცელებული ინფორმაციის თანახმად, იუსტიციის უმაღლესი საბჭოდან გამოთხოვილ დოკუმენტებს შორის არის შორენა ყაველაშვილის სერტიფიკატი, რომელიც ადასტურებს, რომ მან ჩააბარა მოსამართლეობის საკვალიფიკაციო გამოცდა სისხლის სამართლის სპეციალიზაციით.

ფოტო: რუსთავი 2

ფოტო: რუსთავი 2

რუსთავი 2-ის გენერალური დირექტორი ნიკა გვარამია ფეისბუკში წერს, რომ აღნიშნულ საკითხზე იუსტიციის უმაღლესი საბჭოდან ითხოვს განმარტებებს:

"რა უფლებით განიხილა ჩვენი სამოქალაქო საქმე სამოქალაქო სამართალში კვალიფიკაციის არ მქონე მოსამართლემ? ველი პასუხს იუსტიციის უმაღლესი საბჭოსგან და სააპელაციო სასამართლოსგან. ან დასაბუთებას, ასე რატომ მოხდა, რომ სათანადო კვალიფიკაციის მოსამართლე არ გამოინახა საქმის განმხილველად, ან იმის დამადასტურებელ დოკუმენტს, რომ ქალბატონ შორენას ჩაბარებული აქვს საერთო სპეციალიზაციის გამოცდაც"

რ2-ის ადვოკატის, თამთა მურადაშვილის თქმით, ამ დოკუმენტებით დგინდება, რომ რუსთავი 2-ის საქმე განიხილა არაუფლებამოსილმა კოლეგიამ, უკანონო შემადგენლობამ, რაც ცალსახად კანონის დარღვევაა და მათ მიერ მიღებული გადაწვეტილება ყოველთვის ჩაითვლება, როგორც უკანონო.

On.ge ცდილობს დაუკავშირდეს იუსტიციის უმაღლეს საბჭოს. მათ კომენტარს მოგვიანებით შემოგთავაზებთ.

სააპელაციო სასამართლო რ2-ის საქმეზე გადაწყვეტილებას ხვალ, 10 ივნისს წარმოადგენს.