მარტში ცნობილი გახდა, რომ გადაცემა გორგილაძის აუტანელი სიმსუბუქე YouTube-ზე ბრუნდება. ამის შესახებ გადაცემის ფეისბუქის გვერდზე გამოქვეყნებული ვიდეოთი გავიგეთ. ახლახან კი გადაცემის პირველი ეპიზოდის ანონსიც გამოქვეყნდა.

როგორც ანონსში ვხედავთ, წინ ისევ საინტერესო გადაცემები გველის. მართალია, ჯერ არ დასახელებულა, ვინ იქნება გორგილაძის აუტანელი სიმსუბუქის პირველი სტუმარი, თუმცა ანონსის ნახვის შემდეგ მაყურებელს უკვე არაერთი ვერსია გაუჩნდა.

"ძალიან დიდ ავანტიურაზე წავედით. წელიწად-ნახევარია ვჩალიჩობთ ამ ინტერვიუს და არაფერი გამოდის. All in-ის ჩავედით ამ შემთხვევაში", — ამბობს გორგილაძე ანონსში და პირველი ეპიზოდის სტუმარს ელოდება.

შეგახსენებთ, რომ გორგილაძის აუტანელი სიმსუბუქე საზოგადოებრივ მაუწყებელზე გადიოდა, ბოლო ეპიზოდი კი მაყურებელმა გასული წლის 29 დეკემბერს ნახა. საზოგადოებრივმა მაუწყებელმა გორგილაძის აუტანელ სიმსუბუქესთან ერთად კიდევ რამდენიმე გადაცემა დახურა. გორგილაძის აუტანელი სიმსუბუქის პროდიუსერმა, ნატა მაღალაშვილმა, On.ge-სთან განაცხადა, რომ გადაცემის დახურვის მიზეზად საზოგადოებრივმა მაუწყებელმა ფინანსური პრობლემები დაასახელა.

გადაცემის დახურვიდან მალევე გორგილაძის აუტანელი სიმსუბუქის საზოგადოებრივი მაუწყებლის ეთერში დაბრუნებას მოქალაქეები პეტიციით ითხოვდნენ. საზოგადოებრივ მაუწყებელზე გორგილაძის აუტანელი სიმსუბუქის დახურვის შემდეგ, გადაცემის წარმდგენი საქართველოს ბანკი გახდა. გორგილაძის აუტანელ სიმსუბუქეს მაყურებელი უკვე YouTube-ზე იხილავს, თუმცა პირველი ეპიზოდის გამოსვლის თარიღი ჯერჯერობით უცნობია.