საქართველოში უფრო მეტი ადამიანი კვდება, ვიდრე იბადება

რა ხდება: საქართველოს სტატისტიკის ეროვნული სამსახურის (საქსტატი) მონაცემების თანახმად, გასულ, 2023 წელს, საქართველოში უარყოფითი ბუნებრივი მატება დაფიქსირდა.

უარყოფითი ბუნებრივი მატება გულისხმობს სხვაობას ცოცხლად დაბადებულთა და გარდაცვლილთა რიცხოვნობას შორის.

საქსტატის მონაცემებში, უარყოფითი ბუნებრივი მატების სხვაობა მინუს 2 542 ერთეულით განისაზღვრა.

**ბუნებრივი მატება რეგიონების მიხედვით**

ფოტო: საქსტატი

"ამასთან, უარყოფითი ბუნებრივი მატება დაფიქსირდა ყველა რეგიონში, გარდა თბილისის, აჭარის ავტონომიური რესპუბლიკისა და ქვემო ქართლის რეგიონისა", — ვკითხულობთ დოკუმენტში.

დეტალები: 2023 წელს, საქართველოში ცოცხლად დაბადებული ბავშვების რიცხოვნობა, 2022 წელთან შედარებით, 5 %-ით შემცირდა.

**ცოცხლად დაბადებულთა რიცხოვნობა დაბადების რიგითობის მიხედვით**

ფოტო: საქსტატი

2023 წელს ცოცხლად დაიბადა — სულ 40 214 ბავშვი, 19 204 გოგო და 21 010 ბიჭი.
ცოცხლად დაბადებულთა საერთო რიცხოვნობაში, 2022 წელთან შედარებით, რიგით პირველი დაბადებულის წილი შემცირდა 39.1 %-დან 37.7 %-მდე;
მეორე შვილის წილი თითქმის უცვლელი დარჩა და 33.6 % შეადგინა,
ხოლო მესამე და მომდევნო რიგითობის დაბადებულთა წილი 26.6 %-დან 27.5 %-მდე გაიზარდა.

საქსტატის თანახმად, ცოცხლად დაბადებულთა რიცხოვნობა, რეგიონების მიხედვით, ასეთია:

**რეგიონების მიხედვით — ცოცხლად დაბადებულთა რიცხოვნობა**

ფოტო: საქსტატი

გაზრდილია ბავშვთა მოკვდაობის კოეფიციენტი ორ კატეგორიაში — როგორც ჩვილთა, ასევე, 5 წლამდე მოკვდაობის მონაცემის მიხედვით.

**ბავშვთა მოკვდაობის კოეფიციენტი (1 000 ცოცხლად დაბადებულზე) სქესის მიხედვით**

ფოტო: საქსტატი

გარდაცვალების მაჩვენებელი საქართველოს ზრდასრულ მოსახლეობაში: საქსტატი აცხადებს, რომ ეს მაჩვენებელი, 2022 წელთან შედარებით, 13.0 პროცენტით არის შემცირებული და 2023 წელს 42 756 ერთეული შეადგინა.

გარდაცვალების ყველაზე მეტი შემთხვევა დაფიქსირდა: თბილისში — 12 229 ადამიანი;
ყველაზე ნაკლები: რაჭა-ლეჩხუმისა და ქვემო სვანეთის რეგიონში — 580 ადამიანი.