მოკლედ: პრემიერ-მინისტრი ირაკლი კობახიძე ოფიციალური ვიზიტით ჩავიდა ბაქოში დღეს, 16 მარტს.

  • მთავრობის ცნობით, მას ზაგულბას სასახლეში უმასპინძლებს აზერბაიჯანის რესპუბლიკის პრეზიდენტი, ილჰამ ალიევი.
  • კობახიძე-ალიევის შეხვედრა გაიმართება როგორც პირისპირ, ასევე, გაფართოებული ფორმატში.
  • შეხვედრის შემდეგ დაგეგმილია განცხადებები მედიასთან.

კობახიძე აპირებს, პატივი მიაგოს აზერბაიჯანელი ეროვნული ლიდერის ხსოვნას და მარადიული ცეცხლის მემორიალი გვირგვინით შეამკოს.

  • ვისთან ერთად ჩავიდა კობახიძე: დელეგაციაშია პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი და საგარეო საქმეთა მინისტრი ილია დარჩიაშვილი.
  • შეხვედრა აზერბაიჯანელ კოლეგასთან: ირაკლი კობახიძე აზერბაიჯანის რესპუბლიკის პრემიერ-მინისტრს, ალი ასადოვს უკვე შეხვდა.
საქართველოს პრემიერ-მინისტრი ირაკლი კობახიძე აზერბაიჯანის რესპუბლიკის პრემიერ-მინისტრს, ალი ასადოვს შეხვდა

საქართველოს პრემიერ-მინისტრი ირაკლი კობახიძე აზერბაიჯანის რესპუბლიკის პრემიერ-მინისტრს, ალი ასადოვს შეხვდა

ფოტო: საქართველოს მთავრობა

რაზე ისაუბრეს: საქართველოს მთავრობის ადმინისტრაციის თანახმად, საუბრის მთავარი თემები იყო ორი ქვეყნის სტრატეგიული პარტნიორობის ძირითადი მიმართულებები და სხვადასხვა სფეროში, მათ შორის მრავალმხრივ ფორმატებში, წარმატებული თანამშრომლობა.

  • ყურადღება დაეთმო სავაჭრო-ეკონომიკური ურთიერთობების შემდგომ გაღრმავებას და ერთობლივ რეგიონულ პროექტებს.
  • აღინიშნა შუა დერეფნის მნიშვნელობა, მათ შორის ტვირთების ტრანსპორტირების კუთხით.
  • მხარეებმა ისაუბრეს ორი ქვეყნის მთავრობათაშორისი ეკონომიკური კომისიის განსაკუთრებულ როლზე ეკონომიკური თანამშრომლობის შემდგომ განვითარებაში და აღნიშნეს, რომ სხდომის გამართვა ახლო მომავალში იგეგმება.

ბოლო ხაზი: საქართველოს მთავრობის თანახმად, ასადოვთან კობახიძის შეხვედრისას ხაზი გაესვა რეგიონში სტაბილურობისა და მშვიდობის დამყარების განსაკუთრებულ მნიშვნელობას და კონსტრუქციული დიალოგის როლს ამ პროცესში. ირაკლი კობახიძემ ალი ასადოვი ოფიციალური ვიზიტით საქართველოში მიიწვია.