რა ხდება: თავდაცვის სამინისტრო ადასტურებს, რომ ბიზნესმენი დავით ხიდაშელი თავდაცვის მინისტრის მრჩევლად მუშაობდა.

• უწყების ინფორმაციით, ხიდაშელი თანამდებობას 2020 წლიდან 2024 წლის თებერვლამდე იკავებდა.

დეტალები: სამინისტროს განცხადებაში აღნიშნულია, რომ მინისტრ ჯუანშერ ბურჭულაძის თანამდებობიდან წასვლის შემდეგ, ხიდაშელს, კანონის თანახმად, ადმინისტრაციული ხელშეკრულება შეუწყდა და ის თავდაცვის უწყებაში აღარ მუშაობს.

• "ამასთან, დავით ხიდაშელს, თავდაცვის სამინისტროში მუშაობის პერიოდში, არ ჰქონია სახელმწიფო საიდუმლო ცნობებზე დაშვება", — წერია თავდაცვის სამინისტროს განცხადებაში.

კონტექსტი: მთავარმა არხმა მოიპოვა დოკუმენტი, რომლის მიხედვითაც რუსული კავშირების მქონე ბიზნესმენი დავით ხიდაშელი თავდაცვის მინისტრის მრჩევლის პოსტს იკავებდა.

• დოკუმენტის თანახმად მისი ყოველთვიური ანაზღაურება 1 000 ლარი უნდა ყოფილიყო.
• ინფორმაცია მთავარ არხს ბურჭულაძემაც დაუდასტურა.
• "იცით თქვენ, რომ ვმუშაობდით დავით გარეჯის საქმეზე და ჩართული იყო დავითიც ამ საკითხზე, ამ საკითხთან დაკავშირებით, თუ რაღაცაში დაგვჭირდებოდა, ვკითხავდით", — თქვა თავდაცვის ყოფილმა მინისტრმა.

რა ვიცით დავით ხიდაშელზე

დავით ხიდაშელი არის რუსული კავშირების მქონე ბიზნესმენი, რომელიც დაახლოებულია რუს ოლიგარქთან, ვლადიმირ ევტუშენკოვთან. ევტუშენკოვის კომპანია კი სანქცირებულია აშშ-ის მიერ, 2023 წელს. ევტუშენკოვი, ასევე, დაკავშირებულია ბიძინა ივანიშვილთან.

• ხიდაშელს, ასევე, აქვს მაღალი დონის კავშირები საქართველოს ხელისუფლებასთან და ბიძინა ივანიშვილთან.

ხიდაშელი და რაჭის ტყეები: სწორედ მის კომპანიას გადასცა სახელმწიფომ რაჭაში 104,712 ჰექტარ ტყეზე (რაჭის ტერიტორიის მესამედი და ქვეყნის ტერიტორიის 1.4%) სამონადირეო მეურნეობის მოწყობის 49 წლიანი ლიცენზია. საზოგადოებრივი აზრის ზეწოლის შედეგად კი, გარემოს ეროვნულმა სააგენტომ ძალადაკარგულად გამოაცხადა ბრძანება 2023 წლის ნოემბერში.

• მანამდე, ორგანიზაცია საერთაშორისო გამჭვირვალობა — საქართველომ განაცხადა, რომ დავით ხიდაშელთან დადებული გარიგების შედეგად, საქართველომ 2 მილიონი ლარის შემოსავალი დაკარგა.

ხიდაშელი და კარტოგრაფების საქმე: ის, ასევე, არის სკანდალურად ცნობილი ე.წ. კარტოგრაფების საქმის მთავარი ფიგურანტი: კარტოგრაფების საქმის მასალების მიხედვით, დავით ხიდაშელმა 1938 წელს გამოცემული 1:200 000 მასშტაბის რუკა ჩამოიტანა საქართველოში. მისი თქმით, რუკა რუსეთის არქივებიდან აქვს. ხიდაშელმა განაცხადა, რომ დახმარებისთვის მას ქართული ოცნების თავმჯდომარემ, ბიძინა ივანიშვილმა დაურეკა.
კარტოგრაფების საქმეს ივერი მელაშვილისა და ნატალია ილიჩოვას დაპატიმრება, შემდეგ კი გირაოს სანაცვლოდ მათი გათავისუფლება მოჰყვა.

• ხელისუფლებამ კარტოგრაფების საქმის აღძვრისთანავე, პროპაგანდისტული კამპანია შექმნა, სახელწოდებით — გარეჯი საქართველოა.
• 2021 წელს, ბიძინა ივანიშვილმა თქვა, რომ დავით ხიდაშელი, რომელმაც აზერბაიჯანთან საზღვრის დელიმიტაცია-დემარკაციის საქმის რუკები მოიპოვა, მასზე მეტად ქველმოქმედია, მადლობა გადაუხადა და განაცხადა, რომ ამ საქმეს გმირობაში უთვლის.