მოკლედ: პარტია ერთიანი ნაციონალური მოძრაობის თავმჯდომარემ, ლევან ხაბეიშვილმა და გიორგი ვაშაძემ, სტრატეგია აღმაშენებლის თავმჯდომარემ, გამარჯვების პლატფორმის ერთობლივ ფორმატში ისაუბრეს საწვავის ფასზე.

• "საქართველოში საწვავის ფასი უკონტროლოდ იზრდება!", — აცხადებენ ისინი.

დეტალები: ხაბეიშვილის თქმით, 2012 წლისთვის 15 ლიტრის შესაძენ ფასად ახლა 10 ლიტრის ყიდვაა შესაძლებელი.

ენმ-ის ლიდერმა მოსახლეობის სახელით დასვა კითხვა, თუ როგორ ორმაგდება საწვავის ფასი ბენზინგასამართ სადგურზე, როდესაც, მისი თქმით, საწვავის საქართველომდე შემოტანა 1.65 თეთრად ხდება.

• ლევან ხაბეიშვილი: "თვალსაჩინოებისთვის, უნდა დავიწყო პირდაპირ საქმით. ერთ ხელში მიჭირავს 15-ლიტრიანი ავზი და მეორე ხელში 10-ლიტრიანი ავზი. ფაქტობრივად, 12 წლის განმავლობაში ივანიშვილმა 15 ლიტრიდან 5 ლიტრი მოგვპარა. თანხით, რომლითაც თავის დროზე შეიძენდით 15 ლიტრ საწვავს, ახლა შეიძენთ 10 ლიტრ საწვავს. პირობითად, თუ გადავალთ 20 ლიტრზე, იქ უკვე 10 ლიტრს ბიძინა ივანიშვილი და მისი გუნდი ჰპარავს მოსახლეობას."

კონტექსტი: ბოლო დროს ოპოზიცია ხშირად საუბრობს ფასების მომატებულ ზრდასა და სიღარიბეზე. ამის პასუხად, სამთავრობო პარტიაში აცხადებენ, რომ ეს ნაციონალური მოძრაობის "პიარული სახადია."

მაგალითად,

• 13 მარტს, პარლამენტის თავმჯდომარემ, შალვა პაპუაშვილმა განაცხადა, რომ ეს პარტიები რომ ხელისუფლებაში ყოფილიყვნენ, დღეისათვის კუპონები გვექნებოდა და მილიონები ეღირებოდა პური თუ სხვა პროდუქტი: "ისინი საქართველოს ომისკენ მიაქანებდნენ; ჩვენ დღეს უკვე ომგამოვლილი ქვეყანა ვიქნებოდით ნანგრევებში, სადაც საუბარი არ იქნებოდა, რაღაც ათი თეთრით გაძვირდა თუ გაიაფდა."
• იმავე დღეს, სოციალურ და ეკონომიკურ სიდუხჭირეზე კომენტირებისას, პრობლემის ნაცვლად ოპოზიციაზე ფოკუსირდა ქართული ოცნების საპარლამენტო უმრავლესობის ლიდერი, მამუკა მდინარაძეც: "დღეს ფასების ზრდაზე ლაპარაკობს ის ხალხი, ვინც ითხოვდა რუსეთთან სანქციების დაწესებას და ეკონომიკის ჩამოშლას, მაშინ გენახათ ფასების ზრდა და ხალხის გაჭირვება", — თქვა მან.

ბოლო ხაზი: ლევან ხაბეიშვილმა აღნიშნა, რომ ხელისუფლება "გამოგონილ პრობლემას" უწოდებს საწვავის ფასთან დაკავშირებით ოპოზიციის მიერ გაკეთებულ განცხადებებს, და ისაუბრა იმის შესახებაც, თუ როგორ აისახება საწვავის ფასი ზოგადად, სამომხმარებლო პროდუქტების ფასების ზრდაზე.

• "ამ პრობლემის გადაჭრი გზებზე და გამოსავალზე უნდა იზრუნოს ხელისუფლებამ და მათ უნდა ჰქონდეთ პასუხები და არა ცინიზმი, დაცინვა საქართველოს მოქალაქეებზე და არა იმის თქმა, რომ თურმე, ხალხს არ უჭირს", — თქვა მან.

მსგავსი: ირაკლი კუპრაძე: საქართველოში 261 700 სამუშაოს მაძიებელია, ეს ტოტალურ უმუშევრობას ნიშნავს!