ქართველთა მარშის ერთ-ერთი ორგანიზატორი და გაუპატიურების მუქარის შინაარსის კომენტარების ერთ-ერთი ავტორი, გია კორკოტაშვილი არ აღიარებს, რომ კომენტარები მუქარის შემცველი იყო. მისი თქმით, ეს იყო პრივატული საუბარი ორ ადამიანს შორის. ამის შესახებ კორკოტაშვილმა ტელეკომპანია იბერიას ეთერში ისაუბრა:

"არიქა, თურმე ქალების სხეულები დაუცველია და გვიპირებენ ჯგუფურ გაუპატიურებას. ვინ რას გიპირებთ, ნეტა ვინმემ რამე დაგიპიროთ, ვინც დასაპირებელია, თორემ ჩვენ არაფერს არავის არ ვუპირებთ. კანონმორჩილი ვარ, მაგრამ მართლა არ ვიკადრებ ეგეთ ბინძურ რაღაცებს, რომლითაც უნდათ შემამკონ."

კორკოტაშვილი არც იმას ფიქრობს, რომ ბოდიში აქვს მოსახდელი. მისივე თქმით, საქართველოში რომ ცილისწამება დასჯადი იყოს, აუცილებლად უჩივლებდა თათია დოლიძეს თავისი შეფასების გამო:

"რა ბოდიში უნდა მოვიხადო, ვისთან უნდა მოვიხადო ბოდიში? ადამიანთან რომელიც არის ფსბ-ს აგენტი, რომელიც იმ ადამიანებთან დგას, რომელთაც დახოცილი ჰყავთ ნახევარი ბიჭები, ან წამებაში რომ აქვთ მონაწილეობა მიღებული იმასთან მოვიხადო ბოდიში?"

გაეროში საქართველოს ახალგაზრდობის ყოფილი წარმომადგენლის, თათია დოლიძის მიმართ გაუპატიურების ღია მუქარასთან დაკავშირებით შინაგან საქმეთა სამინისტო საქმეს 151-ე, მუქარის მუხლით იძიებს.

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა.

აღნიშნული პოსტი აღარ იძებნება. მისი წაშლის შემდეგ, კომენტარების ავტორთა ნაწილი ამბობდა, რომ მათ ეს არ დაუწერიათ. თუმცა მას შემდეგ, გია კორკოტაშვილმა აღიარა, რომ აღნიშნული კომენტარები ნამდვილად მას ეკუთვნოდა.

"ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.