მოკლედ: საქართველოს შინაგან საქმეთა სამინისტროს სასაზღვრო პოლიციას თანამედროვე, ახალი, ევროპული ტიპის H 145 ვერტმფრენი შეემატა, ინფორმაციას შინაგან საქმეთა სამინისტრო ავრცელებს.

  • ეს არის ერთ-ერთი იმ სამი სამაშველო ვერტმფრენიდან, რომელიც საქართველომ ფრანგულ კომპანია Airbus Helicopters-თან დადებული ხელშეკრულების თანახმად შეიძინა.
  • ხელშეკრულება 2022 წლის 19 დეკემბერს გაფორმდა.

დეტალები: ვერტმფრენი ქართულ მხარეს გერმანიაში, Airbus Helicopters-ის საწარმოში გადასცეს.

  • იქ იმყოფებოდა სასაზღვრო პოლიციის უფროსის მოადგილე გიორგი მალანია და სასაზღვრო პოლიციის სპეციალური დანიშნულების ავიაციის დეპარტამენტის დირექტორი, იოსებ არჯევანიშვილი.

შსს-ს ინფორმაციით:

  • თანამედროვე ევროპული ტიპის H 145 ვერტმფრენი, ფრანგული კომპანია Airbus Helicopters-ის ერთ-ერთი უახლესი მოდელია.
  • ახალი ბორტები სრულად დაკომპლექტებულია ხანძართან ბრძოლისა და სამთო-სამაშველო აღჭურვილობით.
  • აქვთ 2 ძრავა, რაც ზრდის ფრენის უსაფრთხოებას.
  • ამ ტიპის შვეულმფრენები მაღალ სიმაღლეზე ოპერირებისა და მანევრის შესაძლებლობებით გამოირჩევა, რაც, საქართველოს მაღალმთიანი რელიეფის გათვალისწინებით, ამოცანებთან სრულად თავსებადი იქნება.
  • მსგავს ვერტმფრენებს წარმატებით იყენებენ გერმანიის, შვეიცარიის, საფრანგეთის, კანადისა და სხვა ქვეყნების პოლიციისა და საგანგებო სიტუაციების მართვის სამსახურები.

სასაზღვრო პოლიციის სპეციალური დანიშნულების ავიაციის დეპარტამენტის მფრინავები და ბორტ-ტექნიკოსები თეორიულ და პრაქტიკულ მომზადებას გერმანიაში, Airbus Helicopters-ის სასწავლო აკადემიაში გადიან.

  • მომზადების კურსი 15 მარტს დასრულდება, რომლის შემდგომაც ქართული ეკიპაჟი ვერტმფრენს საქართველოში გადმოიყვანს.